Tennıs: Devıs Kýbogy-2013 aıasynda qazaqstandyq qurama Chehııaǵa tegeýrindi qarsylyq kórsetýge daıyn
ASTANA. 3 sáýir. QazAqparat - Tennısten Qazaqstannyń erler quramasynyń kapıtany Dıas Dosqaraev qazaqstandyq komanda chehııalyq sportshylarǵa qarsy matchqa daıyn ekendigin aıtty.
Budan buryn habarlanǵandaı, 5-7 sáýirde Astanada Devıs Kýbogy-2013 álemdik tobynyń shırek fınalynda tennısten Qazaqstannyń erler quramasy Chehııaǵa qarsy oınaıdy.
Búgin Astanada ótken baspasóz máslıhatynda D. Dosqaraev elimizdiń sportshylary atalǵan doda aldynda ózderin jaqsy sezinip júrgendigin jetkizdi. Sonymen qatar kapıtan Chehııa tennısshileri tegeýrindi qarsylas ekenin, sondyqtan da aldaǵy kezdesýdegi tartys ońaıǵa túspeıtinin atap ótti.
Eki jyl buryn Ostrave qalasynda qazaqstandyq tennısshiler Devıs Kýbogy álemdik tobynda Chehııamen tartysqa túsken bolatyn. Onda Andreı Golýbev álemniń 7-shi raketkasy Tomash Berdyhty, al Mıhaıl Kýkýshkın ıAn Gaıekti utyp, shırek fınalǵa joldama alǵan edi.
«Degenmen, olar bizge ese qaıtarý úshin tas-túıin daıyndalyp keldi»,-dedi D. Dosqaraev.
