Tennıs: Denıs Evseev juptyq synda Nur-Sultan týrnıriniń shırek fınalyna shyqty
NUR-SULTAN. QazAqparat – Qazaqstandyq Denıs Evseev ózbekstandyq Denıs Istomınmen birge juptyq synda elordada ótip jatqan Forte Challenger 100 týrnıriniń shırek fınalyna shyqty, dep habarlaıdy QazAqparat tilshisi.
Qos Denıs bastapqy kezdesýin portýgalııalyq Frederıký Ferreıra Sılva – chehııalyq Tomash Mahachpen ótkizdi.
Birinshi partııada portýgalııalyq-chehııalyq jup 6:3 esebimen basym tússe, ekinshisinde Evseev pen Istomın ese qaıyrdy – 7:5. Sodan keıin taı-breıkte jeńisti julyp aldy – 10:7.
Báseke 1 saǵat 22 mınýtqa sozyldy.
D.Evseev pen D.Istomın jartylaı fınalǵa shyǵý úshin osy jarystyń 4-raketkalary bolyp tirkelgen kanadalyqtar Peter Polanskı – Breıden Shnýrmen talasady. Bul ekeýi qazaqstandyqtar Tımofeı Skatov pen Doshtanbek Tashbolatovty 6:2, 6:1 esebimen ońaı jeńdi.
Qazaqstandyqtardyń jekeleı synda búgin de joly bolǵan joq. Aldymen D.Evseev ózbekstandyq D.Istomınge 7:6 (8:6), 3:6, 3:6 esebimen ese jiberdi.
Taǵy bir qazaqstandyq Dmıtrıı Popko amerıkalyq Ýlıss Blanchpen sheberlik baıqasty. Áýeli Ý.Blanch 6:4 esebimen basymdylyq tanytsa, ekinshi sette D.Popko ese qaıyrdy – 6:2. Sheshýshi, úshinshi partııa barysynda D.Popko qarsylasyn qýyp jetkenimen, taı-breıkte jeńisti ýysynan shyǵaryp aldy – 6:7 (7:9).
Osylaısha jekeleı synda Qazaqstannan D.Tashbolatov qana qaldy. Ol erteń alǵashqy aınalymda osy dodanyń 4-raketkasy, úndistandyq Pradjnesh Gýnnesvaranmen kortqa shyǵady.
Eske sala keteıik, budan buryn ıÝ.Pýtıntsevanyń Adelaıda týrnıriniń ekinshi aınalymyna shyqqanyn jazǵan bolatynbyz.
