Tennıs: Denıs Evseev elorda týrnıriniń jartylaı fınalyna shyqty
NUR-SULTAN. QazAqparat – Qazaqstandyq Denıs Evseev «Dáýlet» tennıs ortalyǵynda ótip jatqan ITF World Tennis Tour týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkendeı, jarystyń ekinshi raketkasy bolyp tirkelgen Denıs Evseev shırek fınalda Belarýs ókili Ivan Lıýtarevıchpen kezdesti.
Qazaqstandyq tennısshi qarsylasyn 6:2, 6:2 esebimen tize búktirdi.
D.Evseev fınalǵa shyǵý úshin chehııalyq Davıd Polıakpen talasady.
Taǵy bir qazaqstandyq, Aqtaý qalasynyń túlegi Beıbit Jýkaev shırek fınalda álemniń 273-inshi, osy dodanyń 1-raketkasy, reseılik Evgenıı Karlovskıımen kúsh synasty.
Birinshi partııada breık jasaǵan Beıbit basymdylyq tanytty – 6:3. Ekinshi partııa barysynda qarsylastar breık almasty. Degenmen 12-geımde E.Karlovskıı taǵy bir breık jasap ketti – 7:5. Ol sheshýshi, úshinshi sette de oıyn tizginin ýysynan shyǵarǵan joq – 6:3.
B.Jýkaev jartylaı fınalǵa shyǵa almaǵanymen, múmkindiginiń mol ekendigin kórsetti.
Eske sala keteıik, budan buryn elorda týrnırinde Jibek Qulambaevanyń jartylaı fınalǵa shyǵa almaǵanyn jazǵan bolatynbyz.
