Tennıs: Búgin Astanada qyzdar arasynda «Astana Women's» týrnıri bastalady
ASTANA. 10 qazan. QazAqparat /Jasulan Amanbaıuly/ - Búgin Astanada tennısten áıelder arasynda ITF serııasyndaǵy «Astana Women's» jarysy bastalady.
Jarystyń 10 myń AQSh dollar syıaqysy kimge buıyratynyn Qazaqstan, Frantsııa, Chehııa, Reseı, Qyrǵyzstan jáne AQSh qyzdary ózara jekpe-jekte anyqtaıdy.
Kásipqoılar arasynda ótkizilip otyrǵan týrnırge 14 jáne odan joǵary jastaǵy tennısshiler baqtaryn synaı kelgen. Qazaqstan atynan Kamıla Kerimbaeva (Team Kazakhstan), Anastasııa Epısheva (Team Kazakhstan), Ekaterına Klıýeva (Astana), Ásel Arǵynbaeva (Almaty) jáne Anna Danılına shyǵady.
Atalmysh týrnır Qazaqstan tennısiniń damýyna úlken serpin bermek. Sebebi ol elimizdiń endi ǵana aıaq basyp kele jatqan jas sportshylaryna kásipqoılar týrnırinde upaı jınap, tájirıbe molaıtýǵa múmkindik syılaıdy. Aıta keteıik, Qazaqstan tennıs federatsııasynyń jikteýi boıynsha, atalmysh týrnır eń joǵary sanatqa jatqyzylǵan.
Jarysta jekeleı synnan bólek, juptyq saıystar qarastyrylǵan. Alǵashqy kezdesýler búgin Astanadaǵy Ulttyq tennıs ortalyǵynda ótedi.
