Tennıs: Býblık Vashıngton týrnırin jeńispen bastady
NUR-SULTAN. QazAqparat – Qazaqstandyq Aleksandr Býblık Vashıngton ATP týrnırin jeńispen bastady, dep habarlaıdy QazAqparat tilshisi.
Álemniń 72-raketkasy A.Býblık alǵashqy aınalymda dúnıejúzilik reıtıngte 93-orynda turǵan amerıkalyq Bredlı Klanmen kezdesti.
Birinshi partııa tartysty órbip, taı-breıkke ulasty. Onda qazaqstandyq tennısshi basymdylyq tanytty – 7:6 (7:5).
Ekinshi sette amerıkalyq tennısshi breık jasap, alǵa shyqty. Degenmen A.Býblık ony ári uzatpaı, matchty jeńispen túıindeı bildi – 6:3.
Báseke 1 saǵat 29 mınýtqa sozyldy.
A.Býblık júlde qory 2 mln AQSh dollarynan asatyn jarystyń ekinshi aınalymynda taǵy bir amerıkalyq, osy týrnırdiń 16-ynshy, álemniń 40-raketkasy Frensıs Tıafomen kúsh synasady.
Áıelder arasyndaǵy Vashıngton týrnıriniń birinshi aınalymynda álemniń 84-raketkasy, qazaqstandyq Zarına Dııas bıylǵy Ýımbldon jarysynda tamasha ónerimen talaıdy tańǵaldyrǵan 15 jasar amerıkalyq Korı Gaýffpen sheberlik baıqasady. Qazirgi kezde reıtıngte 146-orynda turǵan K.Gaýff bul jarysqa irikteý saıystarynan keıin qosyldy.
Al Qazaqstannyń birinshi, álemniń 45-raketkasy Mıhaıl Kýkýshkın Los Kabos (Meksıka) dodasynda reıtıngte 92-satydaǵy bosnııalyq Damır Djýmhýrmen kortqa shyǵady.
Eske sala keteıik, budan buryn A.Býblık pen Z.Dııastyń Vashıngton týrnırine qatysatynyn, al Galına Voskoboevanyń juptyq synda ıÝrmala jarysynyń fınalynda jeńilip qalǵanyn jazǵan bolatynbyz.
