Tennıs: Býblık Shanhaıda negizgi týrnırge joldama aldy
NUR-SULTAN. QazAqparat – Qazaqstannyń birinshi, álemniń 57-raketkasy Aleksandr Býblık Shanhaıda negizgi týrnırge joldama aldy, dep habarlaıdy QazAqparat tilshisi.
A.Býblık irikteý saıystarynyń fınalynda dúnıejúzilik reıtıngte 77-orynda turǵan japonııalyq Iosıhıto Nısıokamen kezdesti.
Qazaqstandyq tennısshi qarsylasyn 6:3, 6:2 esebimen onsha qınalmaı utty.
Báseke bir saǵatqa sozyldy.
A.Býblık munyń aldynda reıtıngte 256-oryndaǵy portýgalııalyq Gonsalý Olıveırany 6:4, 6:4 esebimen tize búktirgen bolatyn.
Osylaısha negizgi týrnırge joldama alǵan qazaqstandyq sportshy Shanhaı jarysynyń alǵashqy aınalymynda álemniń 20-raketkasy, kanadalyq Felıks Oje-Alıassımmen sheberlik baıqasady.
Taǵy bir qazaqstandyq, reıtıngte 60-satydaǵy Mıhaıl Kýkýshkınniń qarsylasy – álemniń 51-raketkasy, serbııalyq Mıomır Ketsmanovıch.
Álemniń 1-raketkasy, serbııalyq Novak Djokovıch bastaǵan myqty tennısshiler qatysyp jatqan Shanhaı dodasy (júlde qory – 8 322 885 AQSh dollary) 13 qazanda márege jetedi.
Aıta keteıik, búgin elordada Nur-Sultan 2 chellendjer týrnıri márege jetti. Onda fınalda germanııalyq ıAnnık Madendi 4:6, 6:4, 6:3 esebimen utqan ýkraınalyq Ilıa Marchenko jeńimpaz atandy. Jalpy, Qazaqstan astanasyndaǵy jarys I.Marchenko úshin sátti boldy. Ol juptyq synda da fınlıandııalyq Harrı Helıovaaramen birge qarsylas shaq keltirmedi.
