Tennıs: Býblık pen Golýbev Rolan Garros týrnıriniń jartylaı fınalyna shyqty
NUR-SULTAN. QazAqparat – Qazaqstandyqtar Aleksandr Býblık pen Andreı Golýbev juptyq synda Rolan Garros týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstandyq jup Frantsııa ashyq chempıonatynyń shırek fınalynda monakolyq Hıýgo Nıs - germanııalyq Tım Pıýtspen kúsh synasty.
A.Býblık pen A.Golýbev matchty birden breıkpen bastady – 2:0. Taǵy bir breık – 5:2. Budan keıin monakolyq-germanııalyq jup esepti qysqartqanymen, set qazaqstandyqtardyń enshisinde ketti – 6:4.
Qazaqstandyq jup ekinshi sette de 2:0 esebimen alǵa shyqty. Aqyry osy basymdylyqty saqtap, kezdesýdi sátti aıaqtady – 6:4.
Báseke 1 saǵat 16 mınýtqa sozyldy.
Qazaqstandyq jup fınalǵa shyǵý úshin ıspanııalyqtar Pablo Andýhar – Pedro Martınespen talasady.
Osylaısha A.Býblık pen A.Golýbev juptyq synda Qazaqstan tennısi tarıhynda tuńǵysh ret Frantsııa ashyq chempıonatynyń jartylaı fınalyna shyǵyp otyr.
Eske sala keteıik, budan buryn Elena Rybakınanyń «Úlken dýlyǵa» týrnıriniń 23 dúrkin chempıony Serena Ýılıamsti utqanyn, Tımofeı Skatovtyń Almaty jarysyn jeńispen bastaǵanyn jazǵan bolatynbyz.
Sondaı-aq E.Rybakına juptyq synda da Rolan Garros týrnıriniń shırek fınalyna shyqty.
