Tennıs: Býblık Monpele týrnıriniń ekinshi aınalymyna shyqty
NUR-SULTAN. QazAqparat – Qazaqstannyń birinshi, álemniń 54-raketkasy Aleksandr Býblık Monpele týrnıriniń ekinshi aınalymyna shyqty, dep habarlaıdy QazAqparat tilshisi.
A.Býblık alǵashqy aınalymda dúnıejúzilik reıtıngte 112-orynda turǵan shveıtsarııalyq Genrı Laaksonenmen kezdesti.
Birinshi partııada qarsylastar aldymen breıkpen almasqannan keıin shveıtsarııalyq tennısshi 5:3 esebimen alǵa ketip, setke dop bergende, sol múmkindigin paıdalana alǵan joq. Degenmen ol taı-breıkte basymdylyq kórsetti – 7:6 (7:2).
Esesine ekinshi sette A.Býblık breıkpen alǵa shyqty – 3:0. Sosyn taǵy bir breık jasap, óz geımderin de bermeı, esepti 5:0-ge jetkizdi. Aqyry bul partııany ońaı utty – 6:1.
Úshinshi, sheshýshi partııada esep 3:2 bolǵan mezette shveıtsarııalyq sportshy breık jasaı aldy. Degenmen Býblık te qalyspaı, tarazy basyn teńestirdi – 4:4. Taı-breıkte bul joly qazaqstandyq tennısshi jeńiske jetti - 7:6 (7:2). Tartysty báseke 2 saǵat 9 mınýtqa sozyldy.
A.Býblık júlde qory 606 myńnan astam eýroǵa baǵalanǵan jarystyń shırek fınalyna shyǵý úshin osy týrnırdiń ekinshi, álemniń 10-raketkasy, belgııalyq Davıd Goffenmen talasady.
Eske sala keteıik, budan buryn Andreı Golýbev pen Aleksandr Nedovesovtiń juptyq synda Frantsııadaǵy týrnırdiń jeńimpazy atanǵanyn jazǵan bolatynbyz.
