Tennıs: Býblık Meksıkadaǵy týrnırdiń shırek fınalyna shyǵa almady
NUR-SULTAN. QazAqparat - Qazaqstandyq tennısshi Aleksandr Býblık Meksıkadaǵy San-Lýıs Potosı chellendjer týrnıriniń shırek fınalyna shyǵa almady, dep habarlaıdy QazAqparat tilshisi.
Osy týrnırdiń birinshi raketkasy bolyp tirkelgen, dúnıejúzilik reıtıngte 100-orynda turǵan A.Býblık úshinshi aınalymda brazılııalyq Pedro Sakamotomen kezdesti.
Reıtıngte nebári 480-satyda turǵanyna qaramastan, brazılııalyq sportshy matchty tabysty ótkize bildi. Sóıtip ol 6:3, 7:5 esebimen jeńiske jetip, shırek fınalǵa joldama aldy.
P.Sakamoto jartylaı fınalǵa shyǵý úshin chılılik, álemniń 312-raketkasy Tomas Barrıospen kúsh synasady.
Taǵy bir qazaqstandyq tennısshi, reıtıngte 620-satyda turǵan Dmıtrıı Popko AQSh-ta Orındj-Park ITF týrnırin sátti ótkizýde. Ol birinshi aınalymda amerıkalyq Djon Harrıson-Rıchmondty 6:3, 6:4 esebimen tize búktirdi. Sodan keıin osy jarystyń úshinshi, álemniń 424-raketkasy, kolýmbııalyq Felıppe Mantılıany 6:1, 6:3 esebimen joldan taıdyryp, shırek fınalǵa shyqty.
Jýyrda AQSh-taǵy osyndaı týrnırdiń jeńimpazy atanǵan D.Popko jartylaı fınalǵa shyǵý úshin bolgarııalyq Adrıan Andreevpen talasady.
Eske sala keteıik, budan buryn A.Býblıktiń Meksıkadaǵy týrnırdi jeńispen bastaǵanyn jazǵan bolatynbyz.
Taǵy bir qazaqstandyq Mıhaıl Kýkýshkın Monte-Karlo týrnırin sátti bastaǵanymen, ekinshi aınalymnan asa almady.
Erteń Londonda áıelder arasynda Federatsııa kýbogy ІІ Álemdik tobynyń pleı-off kezeńindegi Ulybrıtanııa - Qazaqstan matchy bastalady.
Oǵan el namysyn qorǵaıtyndar qatarynda Zarına Dııas ta qatysady.
