Tennıs: Býblık Meksıkadaǵy týrnırdi sátti bastady
NUR-SULTAN. QazAqparat - Qazaqstandyq tennısshi Aleksandr Býblık Meksıkadaǵy Leon chellendjer týrnırin sátti bastady, dep habarlaıdy QazAqparat tilshisi.
Álemdik reıtıngte 98-orynda turǵan, osy týrnırdiń 1-raketkasy bolyp tirkelgen A.Býblık alǵashqy kezdesýin Nıderlandy eliniń ókili Skott Grıkspormen ótkizdi.
S.Grıkspordyń reıtıngte 271-satyda turǵanyna qaramastan, birinshi partııa asa tartysty órbidi. Aqyry ol taı-breıkke deıin jetip, onda qazaqstandyq tennısshi 16:14 esebimen basymdylyq tanytty.
Ekinshi sette breık jasaǵan A.Býblık 4:2 esebimen alǵa shyqty. Sodan keıin qarsylasyna esh múmkindik bergen joq - 6:3.
Báseke 1 saǵat 26 mınýtqa sozyldy.
A.Býblık shırek fınalǵa shyǵý úshin álemniń 295-raketkasy, serbııalyq Danılo Petrovıchpen talasady.
Eske sala keteıik, budan buryn qazaqstandyq Elena Rybakınanyń Ystanbuldyń negizgi týrnırine joldama alǵanyn, odan ekinshi aınalymǵa ótip, shırek fınalǵa shyqqanyn jazǵan bolatynbyz.
Al erler arasynda Qazaqstannyń birinshi, álemniń 40-raketkasy Mıhaıl Kýkýshkın Býdapesht týrnıriniń ekinshi aınalymyna óte almaı qaldy.
