Tennıs: Býblık Marsel týrnıriniń fınalyna shyǵa almady
NUR-SULTAN. QazAqparat – Qazaqstannyń birinshi, álemniń 55-raketkasy Aleksandr Býblık Marsel (Frantsııa) ATP týrnıriniń fınalyna shyǵa almady, dep habarlaıdy QazAqparat tilshisi.
A.Býblık jartylaı fınalda álemniń altynshy, osy jarystyń 2-raketkasy, grekııalyq Stefanos Tsıtsıpaspen kúsh synasty.
Grekııalyq sportshy birinshi partııada 7:5 esebimen basym tússe, ekinshi sette de sol qarqynynan aıyrylmady – 6:3.
Báseke 1 saǵat 7 mınýtqa sozyldy.
S.Tsıtsıpas bul dodada óziniń ótken jylǵy chempıondyq ataǵyn qorǵaýda. 2019 jyly fınalda ol taǵy bir qazaqstandyq Mıhaıl Kýkýshkındi utqan bolatyn.
Grekııalyq tennısshi fınalda álemniń 18-raketkasy, kanadalyq Felıks Oje-Alıassım nemese reıtıngte 58-satydaǵy Jıl Sımonnyń bireýimen bas júldeni sarapqa salady.
Eske sala keteıik, budan buryn Elena Rybakınanyń Dýbaı týrnıriniń fınalyna, A.Býblıktiń Marselde jartylaı fınalǵa shyqqanyn jazǵan bolatynbyz.
