Tennıs: Býblık Delreı Bıch jarysynyń negizgi týrnırine joldama aldy
ASTANA. QazAqparat - Qazaqstandyq tennısshi Aleksandr Býblık Delreı Bıch (AQSh, Florıda) týrnıriniń irikteý saıysyn sátti ótkizdi, dep habarlaıdy «QazAqparat» tilshisi.
Álemniń 129-ynshy raketkasy A.Býblık irikteý jarysynyń fınalynda Barbados eliniń ókili, dúnıejúzilik reıtıngte 171-inshi orynda turǵan Derıan Kıngpen kezdesti. 2 saǵat 22 mınýtqa sozylǵan asa tartysty matchta qazaqstandyq tennısshi 7:6 (8:6), 3:6, 6:4 esebimen jeńiske jetti.
Osylaısha, A.Býblık 19 aqpan kúni bastalyp, 25-i kúni márege jetetin Delreı Bıch jarysynyń negizgi týrnırine joldama aldy. Júlde qory 622 675 AQSh dollaryna baǵalanǵan bul týrnırdiń ótken jylǵy jeńimpazy - amerıkalyq tennısshi Djek Sok. Ol bıyl osy jarystyń birinshi raketkasy bolyp tirkelgen. A.Býblıktiń qarsylasy keıin anyqtalady.
Sonymen qatar Qazaqstannyń birinshi, álemniń 54-inshi raketkasy Zarına Dııas Dýbaı týrnıri irikteý saıysynyń fınalyna shyqty. Ol reseılik sportshy, dúnıejúzilik reıtıngte 237-inshi orynda turǵan Veronıka Kýdermetovany 6:0, 7:5 esebimen utty. Zarına fınalda irikteý saıysynyń 2-inshi, álemniń 40-ynshy raketkasy, ýkraınalyq Lesıa Tsýrenkomen sheberlik baıqasady. Osy matchta joly bolsa, onda Dýbaıdyń (júlde qory - 733900 AQSh dollary) negizgi týrnırine shyǵady. Bul týrnır 24 aqpanda aıaqtalyp, jeńimpaz belgili bolady.
