Tennıs: Býblık Býdapesht týrnıriniń jartylaı fınalyna shyqty
ASTANA. QazAqparat - Majarstan astanasy Býdapeshte ótip jatqan chellendjer týrnıriniń shırek fınalynda qazaqstandyq Aleksandr Býblık horvatııalyq Vıktor Galovıchpen kezdesti, dep habarlaıdy QazAqparat tilshisi.
Osy jarystyń 8-raketkasy bolyp tirkelgen 21 jasar A.Býblık dúnıejúzilik reıtıngte 172-orynda tursa, odan jeti jas úlken qarsylasy 229-satyda edi.
Birinshi partııada breık jasaǵan horvatııalyq tennısshi sol basymdylyǵynan aıyrylmaı, 6:3 esebimen jeńiske jetti.
Ekinshi sette qazaqstandyq sportshy esep 4:3 bolǵan mezette breıkke qol jetkizdi. Sosyn óz geımin jibermeı, 6:3 esebimen ese qaıyrdy.
Úshinshi, sheshýshi sette esep 1:1 bolǵannan keıin A.Býblık breık jasap, alǵa shyǵyp, óz geımin de aldy - 3:1. Aqyry ol bul partııany jeńispen támamdady - 6:4.
Tartysty ótken báseke eki saǵatqa jýyq ýaqytqa sozyldy.
Buǵan deıin osy týrnır barysynda qazaqstandyq tennısshi kanadalyq Stıven Dıas pen reseılik Pavel Kotovty tize búktirgen bolatyn.
A.Býblık fınalǵa shyǵý úshin álemniń 219-raketkasy, slovakııalyq Fılıp Horanskımen talasady.
Eske sala keteıik, budan buryn Astanada ótip jatqan Federatsııa kýbogy úshin irikteý kezeńinde Qazaqstan - Úndistan matchyn áýeli Zarına Dııastyń jeńispen bastap, ıÝlııa Pýtıntsevanyń jalǵastyrǵanyn, sosyn Galına Voskoboeva men Anna Danılınanyń juptyq kezdesýdi de utqanyn jazǵan bolatynbyz.
