Tennıs: Býblık Adelaıda týrnıriniń shırek fınalyna shyǵa almady
NUR-SULTAN. QazAqparat – Qazaqstannyń birinshi, álemniń 55-raketkasy Aleksandr Býblık Adelaıda (Aýstralııa) ATP týrnıriniń shırek fınalyna shyǵa almady, dep habarlaıdy QazAqparat tilshisi.
Qazaqstandyq tennısshi ekinshi aınalymda álemniń 33-raketkasy, ulybrıtanııalyq Denıel Evanspen kezdesti.
Birinshi partııada ulybrıtanııalyq sportshy 7:5 esebimen basymdyq tanytty.
Ekinshi sette de ol 5:1 esebimen alǵa ketti. Aqyry jeńisti ýysynan shyǵarǵan joq – 6:2.
Báseke 1 saǵat 15 mınýtqa sozyldy.
D.Evans júlde qory 610 myń AQSh dollarynan asatyn jarystyń jartylaı fınalyna shyǵý úshin reseılik Andreı Rýblev nemese amerıkalyq Sem Kýerrıdiń bireýimen talasady.
Búgin sondaı-aq jyldyń eń basty dodalarynyń biri – Aýstralııa ashyq chempıonatynyń irikteý saıystary da bastaldy.
Eske sala keteıik, budan buryn A.Býblıktiń Aýstralııadaǵy týrnırdi sátti bastaǵanyn, al Elena Rybakınanyń úzdik otyz tennısshiniń qataryna kirgenin jazǵan bolatynbyz.
