Tennıs: Bir kúni ómirge kelgen qos sportshy jartylaı fınalda kezdesedi
ASTANA. QazAqparat - Parıjde tennısten ótip jatqan Rolan Garros týrnırinde latvııalyq Elena Ostapenko óziniń sporttyq jolynda alǵash ret «Úlken dýlyǵa» jarysynyń jartylaı fınalyna shyqty, dep habarlaıdy «QazAqparat» tilshisi.
«Eýrosport» telearnasynan tikeleı efırde kórsetkenindeı, ol shırek fınalda danııalyq, kezinde álemniń birinshi raketkasy bolǵan Karolına Voznıatskıdi 4:6, 6:2, 6:2 esebimen utty. Ásirese, sońǵy partııada álemdik reıtıngte nebári 47-inshi orynda turǵan 19 jasar Ostapenko osy týrnırde 11-inshi raketka bolyp tirkelgen tájirıbeli Voznıatskıden 1:2 esebimen utylyp jatyp, sodan keıin qatarynan bes geımdi óz esebine jazdy.
Osylaısha, Elena Ostapenko óziniń ázirge eń úlken tabysyna qol jetkizip qana qoımaı, Latvııa sportynyń tarıhynda áıelder arasyndaǵy jekeleı synda birinshi ret «Úlken dýlyǵa» týrnıriniń jartylaı fınalyna shyqqan tennısshi atanyp otyr. Endi ol 8 maýsym kúni Shveıtsarııa eliniń ókili, álemniń 31-inshi raketkasy Tımıa Bachınskımen jartylaı fınaldyq kezdesýin ótkizedi. Bir qyzyǵy, dál sol kúni Ostapenko 20, Bachınskı 28 jasqa tolady. Qaısysy jeńse de, fınalǵa joldama alyp, óziniń týǵan kúnine erekshe syı jasaıdy.
Ekinshi jartylaı fınalda ýkraınalyq Elına Svıtolına men rýmynııalyq Sımona Halep jáne frantsııalyq Karolın Garsııa men chehııalyq Karolına Plıshkova juptarynyń jeńimpazdary kezdesedi. Bul shırek fınaldyq matchtar 7 maýsym kúni ótedi. Munda álemniń úshinshi jáne tórtinshi raketkalary Karolına Plıshkova men Sımona Haleptiń múmkindikteri kóbirek.
Taǵy bir aıta ketetin jaıt, bıyl «Rolan Garros» týrnıriniń áıelder arasyndaǵy básekesinde buryn eshqashan bul jarysta ozyp shyqpaǵan tennısshi jeńimpaz atanady. ıAǵnı týrnırdiń burynǵy jeńimpazdarynyń barlyǵy da jarys jolynan shyǵyp qaldy.
