Tennıs: Bazel týrnırinde A.Golýbev te jeńiske jetti
ORAL. QazAqparat - Búgin Shveıtsarııanyń Bazel qalasynda tennısten ótip jatqan halyqaralyq týrnırde qazaqstandyq Andreı Golýbev reseılik, álemniń 62-inshi raketkasy Teımýraz Gabashvılımen sheberlik baıqasty.
Bul kezdesýde álemdik reıtıngte 66-orynda turǵan Andreı 1 eıs, 3 breık jasap, 6:3, 6:3 esebimen eki partııada jeńiske jetti.
Ekinshi aınalymda A.Golýbev latvııalyq Ernest Gýlbıs nemese horvat Borna Chorıchtiń bireýimen kezdesedi.
Eske sala keteıik, atalmysh jarysta osynyń aldynda qazaqstandyq Mıhaıl Kýkýshkın shveıtsarııalyq, dúnıe júziniń tórtinshi raketkasy Stanıslas Vavrınkany utqan bolatyn. Sóıtip Bazel týrnıri qazaqstandyqtar úshin sátti bastaldy.
