Tennıs: Áıelder arasynda «Rolan Garros» týrnıriniń jeńimpazy anyqtaldy
ASTANA. QazAqparat - Parıjde áıelder arasynda «Rolan Garros» týrnıriniń jeńimpazy anyqtaldy, dep habarlaıdy «QazAqparat» tilshisi.
Fınalda álemniń 1-inshi raketkasy, rýmynııalyq Sımona Halep pen dúnıejúzilik reıtıngte 10-ynshy orynda turǵan amerıkalyq Sloan Stıvens kezdesti.
Fınalǵa saı asa tartysty ótken básekede aldymen amerıkalyq tennısshi basymdylyq kórsetti. Birinshi partııany 6:3 esebimen utqan ol ekinshi sette de 2:0 esebimen alda turdy. Alaıda budan keıin rýmynııalyq tennısshi óziniń naǵyz 1-inshi raketkaǵa saı oıynshy ekenin tanyta bildi. Sóıtip ol qalǵan eki partııada 6:4, 6:1 esebimen jeńiske jetti.
Osylaısha S.Halep óziniń sporttyq jolynda alǵash ret «Úlken dýlyǵa» týrnıriniń jeńimpazy atandy. Buǵan deıin 2014 jáne 2017 jyldary «Rolan Garros» jáne 2018 jyly Avstralııa ashyq chempıonatynyń fınalyna shyqqan onyń joly bolmap edi. Bul joly ol chempıon atanǵany úshin 2 mln dollar tabys tabady.
Erler arasyndaǵy «Rolan Garros» týrnıri erteń márege jetedi. Sońǵy básekede álemniń 1-inshi raketkasy, ıspanııalyq Rafael Nadal men reıtıngte 7-satyda turǵan avstrııalyq Domınık Tım oınaıdy. R.Nadal osymen «Rolan Garros» týrnıriniń fınalyna 11-inshi ret shyǵyp otyr.
Eske sala keteıik, qazaqstandyqtardan bul týrnırde sátti óner kórsetken ıÝlııa Pýtıntsevanyń shırek fınalǵa deıin jetkenin jazǵan bolatynbyz.
