Tennıs: Avstralııanyń ashyq chempıonatynda áıelder arasynda fınalǵa shyqqandar belgili boldy

Álemdik reıtıngte tórtinshi orynda kele jatqan qytaı qyzy Lı Naǵa kanadalyq on toǵyz jasar Ejenı Býshar qarsylyq kórsete almady. Lı Na 6:2, 6:2 esebimen jeńip, fınalǵa joldama aldy.

Ekinshi jartylaı fınalda slovakııalyq, 20-oryndaǵy Domınıka Tsıbýlkova men polıak qyzy, álemniń besinshi raketkasy Agneshka Radvanska kúsh synasty. Keshe belorýssııalyq Vıktorııa Azarenkomen oıynnan sharshap qaldy ma, A.Radvanska bul kezdesýde sylbyr qımyldady. Esesine D.Tsıbýlkova sheber oıyn órnegin kórsetip, 6:1, 6:2 esebimen jeńiske jetti.

Sóıtip sońǵy synda Lı Na men Domınıka Tsıbýlkova kúsh synasatyn boldy.

Áıelderdeı emes, erler arasynda, Novak Djokovıchtiń jarys jolynan shyǵyp qalǵany bolmasa, kútpegen nátıjeler kóp bolyp jatqan joq. Búgin chehııalyq Tomash Berdyh pen shveıtsarııalyq Stanıslas Vavrınka arasyndaǵy oıynnan keıin alǵashqy fınalıst belgili bolmaq. Erteń jartylaı fınalda «eski» dostar, ıspanııalyq Rafael Nadal men shveıtsarııalyq Rodjer Federer sheberlik baıqasady.