TENNIS: Avstralııa birinshiliginde Z.Dııas pen ıA.Shvedova ózara synǵa túse ala ma?

Birden aıtaıyq, bul jerde, ásirese, Zarınaǵa asa myqty qarsylas tap bolyp otyr. Álemdik reıtıngte kósh bastaýshylardyń biri, reseılik Marııa Sharapova - tennıs tarıhynda tórt birdeı úlken dýlyǵa týrnırin (Avstralııaǵa qosa AQSh ashyq birinshiligi, Ýımbldon, Rolan Garros) utqan sanaýly sportshylardyń biri. Qazirden-aq ulylardyń qataryna qosylǵan Marııa - qıyn sátterdiń ózinen jol taba biletin, sheberligi kemel tennısshi. Biraq onyń da súrinetin kezi bolady. Bıylǵy Avstralııa chempıonatynyń alǵashqy kezdesýlerinde ózimen buryn jolyǵyspaǵan «jumbaq» sportshylarmen sheberlik baıqasqan ol ekinshi aınalymda otandasy Aleksandra Panovadan utylyp qala jazdady. Eki matchbolyn paıdalana almaǵan A.Panovany ázer degende jeńip, úshinshi aınalymǵa shyqty. Bul M.Sharapovanyń ózine jaqsy sabaq bolǵandaı. Endi sodan qorytyndy shyǵaryp, ózi buryn kezdespegen Qazaqstannyń birinshi raketkasy, jıyrma bir jasar Zarına Dııastyń oıynyn bapkeri ekeýi talqylap, match tizginin birden qolǵa alýǵa tyrysatyny anyq.

Zarınaǵa kelsek, ony bir-aq jyldyń ishinde shyrqaý bıikke kóterilgen tennısshilerdiń biri deýge ábden bolady. Eger ótken jylǵy Avstralııa ashyq chempıonatynyń aldynda Z.Dııas dúnıejúzilik reıtıngte nebári 152-inshi orynda tursa, qazir ol - álemniń 31-inshi raketkasy. Osy órleý jolyn dál ótken jylǵy Avstralııa jarysynan bastady. Іrikteý saıystarynan keıin chempıonattyń úshinshi aınalymyna deıin jetken qazaq qyzyn (Z.Dııas qazirdiń ózinde sol tabysyn qaıtalap otyr) rýmynııalyq, búginde álemniń úshinshi raketkasy Sımona Halep toqtata aldy. Keıin Ýımbldon tórinde tórtinshi aınalymda taǵy da osy S.Halep Z.Dııastyń jolyna turdy. Ótken jyly AQSh-tyń ashyq birinshiliginde úshinshi aınalymǵa deıin barǵan Zarınany reseılik Ekaterına Makarova ári qaraı jibermese, Rolan Garrosta chehııalyq Petra Kvıtova alǵashqy synnan asyrmady. Bulardyń bári - kósh basyndaǵy, aldyńǵy ondyqtyń ishinde kele jatqan myqty oıynshylar. Zarınanyń ózi de ótken jyldy túıindegen sátte Marııa Sharapovadaı ataqty tennısshilermen kezdesýge daıyn ekendigin málimdegen bolatyn. Taısalatyn nesi bar, sonyń sáti búgin týyp tur. Onyń ústine M.Sharapova men Z.Dııastyń matchyn uıymdastyrýshylar Avstralııa chempıonatynyń basty korty - Rod Leıver alańynda tórtinshi kezekke qoıyp otyr. Bul - kezdesýdi tórtkúl dúnıe kóredi degen sóz. Munda, árıne, boljaýshylardyń bári derlik M.Sharapova jeńetinin aıtýda. Degenmen, eger qazaq qyzy ǵaıyptan taıyp sheberligi asyp, atyshýly qarsylasyn jeńip ketip jatsa, onda taǵy bir qazaqstandyq ıAroslava Shvedova nemese qytaılyq Pen Shýaıdyń bireýimen tórtinshi aınalymda jolyǵysady. ıAǵnı qos qazaqstandyq tennısshiniń ózara synǵa túsýi de múmkin.

Dúnıejúzilik satyda 66-ynshy orynda turǵan ıA.Shvedova men álemniń 21-inshi raketkasy P.Shýaıdyń kezdesýi 2-inshi kortta birinshi bolyp ótedi. P.Shýaı - M.Sharapovadaı azýly bolmasa da, Qytaı eliniń osy chempıonatta qalǵan jalǵyz úmiti. Sondyqtan ol da baryn salady. Qazaqstandyqtar birinshi aınalymda álemniń 16-ynshy raketkasy, chehııalyq Lıýsı Shafarjovany utqan ıAroslavaǵa úmit artady.

Chempıonat.kom saıtynan alynǵan málimetke qaraǵanda, áıelder jarysynda úshinshi aınalymǵa ótkender arasynda AQSh-tyń bási basym. Qalǵan úzdik 32 oıynshynyń jeteýi - amerıkandyq, tórteýi - chehııalyq. Solardyń ishinde álemniń birinshi raketkasy, amerıkandyq, úlken dýlyǵa týrnırin jekeleı synda 18 márte utqan Serena Ýılıams jolyndaǵylardyń bárin jaıpap kele jatsa, bas júldeden úmitkerler qatarynda sondaı-aq reseılik M.Sharapova, rýmynııalyq S.Halep, chehııalyq P.Kvıtova, polıak Agneshka Radvanska, kanadalyq Ejenı Býshar, slovakııalyq, Avstralııa chempıonatynyń ótken jylǵy fınalısi Domınıka Tsıbýlkovany ataýǵa bolady. Bulardyń qataryna keshe álemniń segizinshi raketkasy, danııalyq, tegi polıak, kezinde ózi de kósh bastaǵan Karolına Voznıatskıdi tize búktirgen belorýssııalyq, Avstralııa chempıonatyn 2012 jáne 2013 jyldary eki márte utqanymen, ótken jylǵy sátsizdikter aıaǵyna tusaý bolyp, sodan endi ǵana aıyǵyp kele jatqan Vıktorııa Azarenko qosyldy. Demek, bas júlde bireý, úmitker barshylyq. Sondyqtan osal qarsylas joq, bul - osy aıdyń aıaǵynda márege jetetin Avstralııa chempıonaty kún saıyn qyza túsedi degen sóz.