Tennıs: Avstralııa ashyq chempıonatynyń fınalynda Rafael Nadal men Rodjer Federer kezdesedi
ASTANA. QazAqparat - Búgin tennısten Avstralııa ashyq chempıonatynda erler arasynda jartylaı fınalda ıspanııalyq Rafael Nadal men bolgarııalyq Grıgor Dımıtrovtiń kezdesýi asa tartysty ótip, bes saǵatqa jýyq ýaqytqa sozyldy, dep habarlaıdy «QazAqparat» HAA tilshisi.
«Eýrosport» telearnasynan tikeleı efırde kórsetkenindeı, R.Nadal osy aıtýly dodanyń 9-ynshy raketkasy bolsa, G.Dımıtrov 15-inshi bolyp tirkelgen edi. Rafael Nadal álemniń burynǵy birinshi raketkasy bolǵanymen, bolgarııalyq tennısshiniń sońǵy jyldary sheberlik deńgeıi óse túsken edi. Sondyqtan qarsylastar taıtalasyp-aq baqty. Birinshi partııada Nadal 6:3 esebimen jeńiske jetse, odan keıin Dımıtrov 7:5 esebimen ese qaıyrdy. Sodan soń taı-breıkte ıspanııalyq tennısshi basym tússe, sosyn dál osyndaı jaǵdaıda bolgarııalyq sportshy ese qaıyrdy. Sheshýshi, besinshi partııada esep 4:4 bolyp turǵan sátte R.Nadal breık jasap ketti. Aqyry ol 6:4 esebimen jeńiske jetti.
Endi R.Nadal fınalda óziniń kóptengi syralǵy qarsylasy, álemniń burynǵy taǵy bir birinshi raketkasy, shveıtsarııalyq Rodjer Federermen kezdesedi. Ekeýi «Úlken dýlyǵa» týrnırlerinde talaı márte jeńiske jetkenimen, sońǵy jyldary joldary bolmaı júrgen edi. Endi bireýiniń Avstralııa ashyq chempıonatyn utatyny anyq.
Eske sala keteıik, áıelder arasyndaǵy jekeleı synda amerıkalyq apaly-sińlili Vınýs pen Serena Ýılıams kortqa shyǵady. Olardyń da fınalda ózara kezdespegenine biraz ýaqyt ótken edi. Bul da osy birinshiliktiń bir ereksheligi bolyp otyr.
