Tennıs: Astana Open týrnıriniń tuńǵysh chempıondary anyqtaldy
NUR-SULTAN. QazAqparat – Astana Open ATP 250 týrnıriniń tuńǵysh chempıondary anyqtaldy, dep habarlaıdy QazAqparat tilshisi.
Elordada ATP 250 deńgeıinde alǵash ret ótken jarysta jekeleı synda fınalda álemniń 39-raketkasy, frantsııalyq Adrıan Mannarıno reıtıngte 45-orynda turǵan aýstralııalyq Djon Mıllman kúsh synasty.
Ekeýiniń de tájirıbesi mol, jas shamalary qaraılas tennısshiler edi. Buǵan deıin olar ózara eki márte kezdesken. Ótken jyly Tokıo dodasynda D.Mıllman alǵashqy aınalymda A.Mannarınony utyp, fınalǵa deıin jetip, onda álemniń 1-raketkasy, serbııalyq Novak Djokovıchke ese jibergen. Bıyl AQSh-taǵy Tsıntsınnatı jarysynda da aýstralııalyq tennısshi qarsylasynan basym túsken. Degenmen A.Mannarıno 2019 jyly Nıderlandy elindegi Hertogenbosh ATP 250 týrnırinde top jarǵan bolatyn.
Astana Open týrnırinde A.Mannarıno fınalǵa deıin sátti oınap, qarsylasyna birde-bir setti berip kórmese, aýstralııalyq tennısshi amerıkalyqtar Tommı Pol men Frensıs Tıafodan úshinshi, sheshýshi partııada jeńilip jatyp, utyp ketken edi.
Birinshi partııa barysynda frantsııalyq sportshy breık-poınttaryn paıdalana almady. Al D.Mıllman esep 6:5 bolǵan mezette breık jasap ketti – 7:5.
D.Mıllman ekinshi sette de breıkpen alǵa shyqty – 3:1. Taǵy bir breık – 5:1. Sodan keıin matchqa dop bergende, qatelesken joq – 6:1
Fınaldyq báseke 1 saǵat 48 mınýtqa sozyldy.
Osylaısha 31 jastaǵy D.Mıllman Astana Open jarysynyń tuńǵysh chempıony atandy. Bul onyń ATP týrnırlerindegi alǵashqy jeńisi edi.
Juptyq synda fınalda týrnırdiń birinshi jáne ekinshi raketkalary, belgııalyqtar Sander Jılle men Ioran Flıgen jáne aýstralııalyqtar Maks Persell men Lıýk Sevıll sheberlik baıqasty. Munda belgııalyq jup shyn máninde de myqty ekendigin tanytyp, 7:5, 6:3 esebimen jeńiske jetti. Sóıtip elderine bas júldemen qaıtty.
Eske sala keteıik, budan buryn Astana Open týrnırinde fınalǵa shyqqan tennısshilerdiń belgili bolǵanyn, A.Býblıktiń Parıj jarysyndaǵy qarsylasy anyqtalǵanyn jazǵan edik.
