Tennıs: Anna Danılına Dýbaıdaǵy týrnırdiń shırek fınalyna shyqty
NUR-SULTAN. QazAqparat – Qazaqstandyq Anna Danılına juptyq synda Dýbaıdaǵy ITF W 100 týrnıriniń shırek fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, jarystyń birinshi raketkalary bolyp tirkelgen A.Danılına slovakııalyq Vıktorııa Kýzmovamen birge betashar oıyndarynda reseılikter Oksana Selehmeteva – Anastasııa Gasanovamen kezdesti.
Birinshi partııada Danılına men Kýzmova úsh breıktiń nátıjesinde basymdylyq tanytty – 6:3.
Ekinshi sette qazaqstandyq-slovakııalyq jup 2:4 esebimen utylyp jatyp, tarazy basyn teńestirdi. Sosyn 5:5 bolǵan mezette taǵy bir breık jasap, óz geımderin de aldy – 7:5.
A.Danılına men V.Kýzmova jartylaı fınalǵa shyǵý úshin túrkııalyq Berfý Chengız – Polsha ókili Veronıka Falkovska nemese slovakııalyq Krıstına Kýtsova – Renata Vorakova juptarynyń qaı jeńgenimen talasady.
Jekeleı synda A.Danılına alǵashqy aınalymda A.Gasanovaǵa ese jiberdi – 1:6, 4:6.
Eske sala keteıik, budan buryn qazaqstandyq qyzdardyń Azııa birinshiliginiń jartylaı fınalyna shyqqanyn jazǵan bolatynbyz.
