Tennıs: Anna Danılına Brazılııada top jardy
ASTANA. 19 naýryz. QazAqparat - Brazılııa memleketinde ótken halyqaralyq ITF Junior jarysynda qazaqstandyq Anna Danılına qos saıysta jeńiske jetti.
Aqtyq synda 17 jasar jerlesimiz tartysty úsh sette 6:4, 4:6, 6:3 esebimen Shvetsııa elinen kelgen Ellen Algýrınnen mereıin asyrdy.
Odan buryn jartylaı fınalda týrnırdiń 9-shy raketkasy Anna amerıkandyq Shalına Sholdy eki sette 6:3,7:5 upaıymen aılasyn asyrsa, básekeniń ¼ fınalynda ýkraınalyq Marıanna Zakarlıýkti jeńdi. Esep-6:4, 0:6, 6:4.
Halyqaralyq reıtınginiń kórsetkishi boıynsha,jerlesimiz dúbirli jarysty ekinshi kezeńnen bastaǵan bolatyn. Týrnırdiń ekinshi aınalymynda qazaqstandyq jas sportshy AQSh-tyń tennısshisi Katrın Izabel Stefensonmen joly túıisti. Ony jerlesimiz eki sette 6:4, 6:2 esebimen ońaı jeńdi. Úshinshi aınalymda bizdiń tennısshi argentınalyq Vıktorııa Boskaǵa qarsy alańǵa shyǵyp, ony da eki sette 6:2,6:2 upaıymen qapy qaldyrdy.
Sondaı-aq, ol juptasyp óner kórsetý saıysynda Polsha eliniń ókili Zýzanna Matsıevskamen birge top jardy. Fınaldyq kezdesýde Danılına/Matsıevska juby Fernı Anjeles Pas(Perý)/Katrın Izabel Steffensen (AQSh) odaǵyn eki sette 6:1, 6:2 upaıymen utty.
