Tennıs: Andreı Golýbev juptyq synda Sankt-Peterbýrg týrnıriniń jartylaı fınalyna shyqty
NUR-SULTAN. QazAqparat – Qazaqstandyq Andreı Golýbev juptyq synda Sankt-Peterbýrg ATP 250 týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, A.Golýbev monakolyq Hıýgo Nıspen birge shırek fınalda meksıkalyq Santıago Gonsales – argentınalyq Andres Moltenımen kezdesti.
Bir apta buryn Gonsales pen Moltenı Máskeýdegi osyndaı jarystyń alǵashqy aınalymynda Golýbev pen Nısti 5:7, 7:6, 10:7 esebimen jeńgen bolatyn.
Bul joly birinshi set qana tartysty órbidi. Onda Andreı men Hıýgo taı-breıkte basymdylyq tanytty – 7:6 (7:4). Ekinshi partııada bir breıkke qol jetkizgen Golýbev pen Nıs matchty jeńispen túıindedi – 6:3.
Qazaqstandyq-monakolyq jup fınalǵa shyǵý úshin kanadalyq Denıs Shapovalov – úndistandyq Rohan Bopannamen talasady.
Taǵy bir qazaqstandyq Aleksandr Nedovesov ýkraınalyq Denıs Molchanovpen birge Brest (Frantsııa) chellendjer dodasynyń jartylaı fınalynda frantsııalyqtar Sadıo Dýmbııa – Faben Rebýldan utylyp qaldy – 6:7 (12:14), 2:6.
Eske sala keteıik, budan buryn qazaqstandyq jas tennısshiniń elordada halyqaralyq týrnırdiń shırek fınalyna shyqqanyn jazǵan bolatynbyz.
Qazaqstandyq, 21 jastaǵy Beıbit Jýkaev el astanasynda kanadalyq Fılıp Pelıvodan tartysty matchta 7:6 (7:1), 5:7, 2:6 esebimen ese jiberip, jartylaı fınalǵa shyǵa almady.
