Tennıs: Almatyda ótetin týrnırde qazaqstandyqtardyń qarsylastary anyqtaldy
NUR-SULTAN. QazAqparat – Almatydaǵy «TsSKA» tennıs ortalyǵynda «Beeline Open Challenger 80 Almaty» týrnıriniń jerebesi tartyldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, osy chellendjer jarysynyń 6-raketkasy bolyp tirkelgen qazaqstandyq Dmıtrıı Popko irikteý saıysy jeńimpazdarynyń birimen synǵa túsedi.
Uıymdastyrýshylardan arnaıy shaqyrtý alǵan Denıs Evseev ıtalııalyq Rıkkardo Bonadıomen kezdesedi. Tımofeı Skatov Almaty chellendjer týrnıriniń 2019 jylǵy jeńimpazy, taǵy bir ıtalııalyq Lorentso Djýstınomen sheberlik baıqasady. Beıbit Jýkaevqa da myqty qarsylas tap boldy. Ol dodanyń 1-raketkasy, slovakııalyq Andreı Martınmen kortqa shyǵady.
Juptyq básekede Dostanbek Tashbolatov pen B.Jýkaev alǵashqy aınalymda belgııalyqtar Zızý Bergs – Kımmer Koppeıans, D.Evseev ózbekstandyq Denıs Istomınmen birge ýkraınalyq Vladıslav Manafov – reseılik Evgenıı Týrnevpen joldary toqaılasady. Sondaı-aq T.Skatov ıspanııalyq Karlos Hımeno Valeromen birge ıspanııalyqtar Adrıan Menendes – Roberto Ortega, D.Popko mysyrlyq Mohamed Safvatpen birge kanadalyq Braıden Shnýr – taıbeılik ıAng Tsýng, Grıgorıı Lomakın reseılik ıAn Bondarevskıımen birge bolgarııalyq Dımıtar Kýzmanov – ıtalııalyq Marko Moronımen oınaıdy.
Eske sala keteıik, budan buryn Elena Rybakınanyń Rolan Garros týrnıriniń tórtinshi aınalymyna shyqqanyn jazǵan bolatynbyz.
E.Rybakına Frantsııa ashyq chempıonatynyń shırek fınalyna shyǵý úshin óz sport jolynda alǵash ret ataqty amerıkalyq, «Úlken dýlyǵa» týrnırleriniń 23 márte chempıony Serena Ýılıamspen talasady.
