Tennıs: Aleksandr Nedovesov juptyq synda AQSh-taǵy týrnırdiń fınalynda jeńilip qaldy
NUR-SULTAN. QazAqparat – Qazaqstandyq Aleksandr Nedovesov juptyq synda Delreı Bıch (AQSh) ATP 250 týrnıriniń fınalynda jeńilip qaldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, qazaqstandyq tennısshi pákstandyq Aısam-ýl-Hak Kýreshımen birge fınalda jarystyń 1-raketkalary Marselo Arevalo (Salvador) – Jan-Jıýlen Roıermen (Nıderlandy) bas júldeni sarapqa saldy.
Tartysty matchta salvadorlyq-nıderlandylyq jup 6:2, 6:7 (5:7), 10:4 esebimen jeńiske jetti.
Eki saǵatqa jýyq ýaqytqa sozylǵan báseke barysynda Nedovesov pen Kýreshı 1 eıs jasap, 1 breıkpen shekteldi.
Osylaısha A.Nedovesov óz sporttyq jolynda ATP 250 dodasynda alǵashqy tıtýlyna qol jetkize almady.
Eske sala keteıik, budan buryn ıÝlııa Pýtıntsevanyń Dohada álemniń burynǵy birinshi raketkasyna jol bergenin jazǵan bolatynbyz.
