Tennıs: Aleksandr Býblıktiń Eshtorıl týrnırindegi qarsylasy anyqtaldy
NUR-SULTAN. QazAqparat – Qazaqstannyń birinshi, álemniń 42-raketkasy Aleksandr Býblıktiń Eshtorıl (Portýgalııa) ATP 250 týrnırindegi qarsylasy anyqtaldy, dep habarlaıdy QazAqparat tilshisi.
Osy dodanyń 5-raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngte 100-orynda turǵan ıspanııalyq Pedro Martınespen kezdesedi.
P.Martınes – irikteý saıystary jeńimpazdarynyń biri.
Eshtorıl dodasy 26 sáýir – 2 mamyr aralyǵynda ótedi.
2019 jyly bul jarysta fınalda ýrýgvaılyq Pablo Kýevasty 6:3, 7:6 esebimen utqan grekııalyq Stefanos Tsıtsıpas jeńimpaz atanǵan edi. Ótken jyly pandemııaǵa baılanysty bul týrnır ótpeı qaldy.
S.Tsıtsıpas bıylǵy qatysýshylar qatarynda joq. Ol keshe Barselona ATP 500 týrnıriniń fınalynda 3 saǵat 38 mınýtqa sozylǵan asa tartysty básekede ıspanııalyq Rafael Nadaldan 4:6, 7:6 (8:6), 5:7 esebimen utylyp qaldy. R.Nadal Barselonada osymen 12 márte chempıon atandy. Al A.Býblık úshinshi aınalymǵa shyǵa almady.
Eske sala keteıik, budan buryn Aleksandr Býblıktiń Barselonada úshinshi aınalymǵa shyǵa almaǵanyn, ATP týrnırlerinde eıs sany jóninen kósh bastap kele jatqanyn, Zara Dárkenniń Serbııadaǵy týrnırde chempıon atanǵanyn jazǵan bolatynbyz.
