Tennıs: Aleksandr Býblık Sankt-Peterbýrg týrnırin jeńispen bastady
NUR-SULTAN.QazAqparat – Qazaqstannyń birinshi, álemniń 34-raketkasy Aleksandr Býblık Sankt-Peterbýrg ATP 250 týrnırin jeńispen bastady, dep habarlaıdy QazAqparat tilshisi.
Jarystyń 7-raketkasy bolyp tirkelgen A.Býblık bastapqy kezdesýin ortalyq kortta dúnıejúzilik reıtıngte 304-orynda turǵan reseılik Evgenıı Tıýrnevpen ótkizdi.
Bıyl 24 jasqa tolǵan qos tennısshi Sankt-Peterbýrg óńirinde óskendikten, bir-birin jasóspirim shaqtarynan jaqsy biledi.
Birinshi partııada qazaqstandyq tennısshi breıkpen alǵa ketti – 3:1. Sol basymdylyǵynan aıyryla qoıǵan joq – 6:3.
Ekinshi sette de osy stsenarıı qaıtalandy – 3:1. Aqyry matchty jeńispen túıindedi – 6:4.
1 saǵat 5 mınýtqa sozylǵan báseke barysynda Býblık 12 eıs jasap, 3 breık-poınttyń ekeýin paıdalandy. Qarsylasy 4 eıspen shekteldi.
A.Býblık shırek fınalǵa shyǵý úshin álemniń 53-raketkasy, germanııalyq ıAn-Lennard Shtrýfpen talasady. Ol alǵashqy aınalymda reıtıngte ózinen eki saty joǵary turǵan aýstralııalyq Djeıms Dakvortty 7:6 (7:1), 6:3 esebimen tize búktirdi.
Júlde qory 863 myń AQSh dollarynan asatyn atalmysh doda 31 qazanda márege jetedi.
Taǵy bir qazaqstandyq Dmıtrıı Popko irikteý saıystarynyń fınalynda fınlıandııalyq Emıl Rýýsývýorıden 6:7 (2:7), 4:6 esebimen utylyp, negizgi týrnırden tys qaldy.
Eske sala keteıik, budan buryn Jibek Qulambaevanyń Qaraǵandydaǵy týrnırdiń chempıony atanǵanyn , Zarına Dııastyń AQSh-taǵy týrnırdiń fınalynda ese jibergenin jazǵan bolatynbyz.
Sondaı-aq Zarına Dııas álemdik reıtıngte úzdik júzdikke qaıta oraldy.
