Tennıs: Aleksandr Býblık «Rolan Garrosta» jeńilip qaldy

Bul match Frantsııa ashyq chempıonatynyń bas korty - Fılıpp Shatrıe atyndaǵy arenada ótti.

D.Tım álemniń 4-raketkasy bolsa, 21 jasar qazaqstandyq tennısshi 91-satyda edi. Sondyqtan A.Býblıkke jarystyń basty favorıtteriniń birimen aıqasýǵa týra keldi. Aleksandrdiń bir ereksheligi, dop bergende, soqqysy barynsha dál de qatty, sondyqtan eısti de jasaı biledi. Degenmen eki márte qatelikke de jol beretini bar.

Birinshi partııada breık jasaǵan Tım 4:1 esebimen alǵa ketti. Aqyry ol óz basymdylyǵynan aıyrylǵan joq - 6:3.

Esesine ekinshi partııada breık jasaı bilgen Býblık alǵa shyqty - 4:1. Esep 5:3 bolyp, Býblık setke dop bergende, sol múmkindigin paıdalana almady. Sosyn tarazy basy teńesti - 5:5. Tartysty órbigen taı-breıkte Aleksandrdyń joly boldy - 8:6.

Úshinshi sette esep 4:3 bolǵan mezette Tım breık jasap, partııany óz paıdasyna sheshe bildi - 6:3.

Tórtinshi partııada breık jasaǵan Býblık alǵa shyqty - 2:0. Esep 5:3 bolyp, setke dop bergende, óz múmkindigin múlt jiberdi. Tórt geımdi qatarynan alǵan Tım matchty jeńispen támamdady - 7:5.

Tartysty báseke 2 saǵat 31 mınýtqa sozyldy.

Jeńilip qalsa da, A.Býblık myqty tennısshilerdiń ózimen terezesi teń óner kórsete alatyndaı múmkindigi bar ekendigin tanytty. Eısti de qarsylasyna qaraǵanda, áldeqaıda kóbirek jasady.

Osylaısha jekeleı synda «Rolan Garros» týrnırinde Qazaqstannan eshkim qalmady.

Juptyq synda ekinshi aınalymǵa shyqqan qazaqstandyq Mıhaıl Kýkýshkın belgııalyq Ioran Flıgenmen birge ýrýgvaılyq Pablo Kýevas pen ıspanııalyq Felısıano Lopespen kúsh synasady.

Áıelder arasynda Galına Voskoboeva juptyq synda reseılik Veronıka Kýdermetovamen birge búgin jarystyń besinshi raketkasy bolyp tirkelgen aýstralııalyq Samanta Stosýr men qytaılyq Chjan Shýaımen kortqa shyǵady.

Eske sala keteıik, budan buryn Zarına Dııastyń jeńilip qalǵanyn, M.Kýkýshkınniń juptyq synda ekinshi aınalymǵa shyqqanyn jazǵan bolatynbyz.