Tennıs: Aleksandr Býblık Nıýport týrnıriniń fınalyna shyqty
NUR-SULTAN. QazAqparat – Qazaqstandyq Aleksandr Býblık Nıýport (AQSh) ATP týrnıriniń fınalyna shyqty, dep habarlaıdy QazAqparat tilshisi.
Dúnıejúzilik reıtıngte 83-orynda turǵan A.Býblık jartylaı fınalda álemniń 98-raketkasy, ıspanııalyq Marsel Granolerspen kúsh synasty.
Týrnırdiń 7-raketkasy bolyp tirkelgen A.Býblık 22-de bolsa, tájirıbeli qarsylasy 33 jasta edi.
Birinshi partııany tamasha bastaǵan qazaqstandyq tennısshi 4:0 esebimen alǵa shyqty. Alaıda budan keıin ıspanııalyq sportshy qatarynan bes geımdi aldy. Aqyry bul set taı-breıkke ulasyp, onda Býblık sátti oınady – 7:6 (7:5).
Ekinshi sette ıspanııalyq tennısshi breıkpen alǵa shyqty – 2:0. Ol taǵy bir breıkpen bul setti óz paıdasyna aıaqtady – 6:3.
Úshinshi, sheshýshi partııada esep 2:2 bolǵan mezette A.Býblık breık jasap, óz geımin de bermedi – 4:2. Sosyn osy basymdylyǵynan aıyrylǵan joq – 6:4.
Tartysty báseke 2 saǵat 4 mınýtqa sozyldy.
A.Býblık fınalda osy týrnırdiń (júlde qory – 583 585 AQSh dollary) birinshi, álemniń 15-raketkasy, amerıkalyq Djon Isner nemese reıtıngte 48-satydaǵy frantsııalyq Ýgo Ýmberdiń bireýimen kortqa shyǵady.
Eske sala keteıik, budan buryn A.Býblıktiń Nıýport týrnıriniń jartylaı fınalyna shyqqanyn, Andreı Golýbev pen Aleksandr Nedovesovtiń juptyq synda Nur-Sultan dodasynyń jeńimpazy atanǵanyn jazǵan bolatynbyz.
Sondaı-aq taǵy bir qazaqstandyq Elena Rybakına Býharest jarysynyń fınalyna shyqty.
