Tennıs: Aleksandr Býblık Maıamı týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 33-raketkasy Aleksandr Býblık Maıamı ATP Masters 1000 týrnıriniń úshinshi aınalymyna shyqty, dep habarlaıdy QazAqparat tilshisi.
Júlde qory 8,6 mln AQSh dollaryna jýyqtaıtyn jarystyń 30-raketkasy bolyp tirkelgen A.Býblık dodany birden ekinshi aınamymnan bastap, dúnıejúzilik reıtıngte 118-orynda turǵan kolýmbııalyq Danıel Elahı Galan Rıverospen synǵa tústi.
Tartysty ótken birinshi partııada kolýmbııalyq sportshy taı-breıkte sáttirek oınady – 7:6 (9:7).
Ekinshi sette qazaqstandyq tennısshi tarazy basyn ózine aýdardy – 6:3. Aqyry úshinshi, sheshýshi partııada jeńisti julyp aldy – 6:4.
A.Býblık 2 saǵat 10 mınýtqa sozylǵan matchta 11 eıs jasap, 12 breık-poınttyń jartysyn óz esebine jazdy. Qarsylasy 1 eıs, 4 breıkpen (9 breık-poınt) shekteldi.
Aleksandr Býblık úshinshi aınalymda álemniń 8-raketkasy, norvegııalyq Kasper Rýýdpen kezdesedi. Ol shveıtsarııalyq Henrı Laaksonendi 6:1, 6:2 esebimen tize búktirdi. Jýyrda Norvegııamen matchta A.Býblık K.Rýýdty jeńgen bolatyn.
Eske sala keteıik, budan buryn Maıamı týrnırinde Mıhaıl Kýkýshkınniń ekinshi aınalymǵa ótkenin, Devıs kýbogynda Qazaqstannyń úshinshi sebetke túskenin jazǵan bolatynbyz.
Sondaı-aq Elena Rybakına Maıamı týrnıriniń úshinshi aınalymyna shyqty.
