Tennıs: Aleksandr Býblık Madrıd masters týrnıriniń shırek fınalyna shyqty
NUR-SULTAN. QazAqparat – Qazaqstannyń birinshi, álemniń 44-raketkasy Aleksandr Býblık Madrıd masters týrnıriniń shırek fınalyna shyqty, dep habarlaıdy QazAqparat tilshisi.
Qazaqstandyq tennısshi úshinshi aınalymda álemniń 27-raketkasy, reseılik Aslan Karatsevpen kúsh synasty.
Birinshi partııada esep 4:3 bolǵan mezette A.Býblık úsh bireı breık-poıntyn paıdalana almady. Degenmen setbolda mundaı múmkindikti múlt jibergen joq – 6:4.
Ekinshi sette áýeli A.Karatsevtiń breık jasaıtyn múmkindikteri bolǵanymen, oǵan Býblık jol bergen joq. Esesine esep 2:1 bolǵan mezette qazaqstandyq sportshy breık jasaı aldy. Sosyn óz geımin alyp, esepti 4:1-ge jetkizdi. Aqyry matchty eıspen bitirdi – 6:3.
A.Býblık 1 saǵat 15 mınýtqa sozylǵan match barysynda 14 eıs jasady.
A.Býblık bıyl osymen ekinshi ret masters týrnıriniń shırek fınalyna shyǵyp otyr. Budan buryn Maıamıde de osyndaı tabysqa qol jetkizgen edi.
Qazaqstandyq tennısshi júlde qory 2,6 mln eýrodan asatyn aıtýly jarystyń jartylaı fınalyna shyǵý úshin álemniń 5-raketkasy, grekııalyq Stefanos Tsıtsıpas nemese reıtıngte 22-satydaǵy norvegııalyq Kasper Rýýdtyń bireýimen talasady.
Eske sala keteıik, budan buryn Aleksandr Býblıktiń Madrıd masters týrnıriniń úshinshi aınalymyna shyqqanyn jazǵan bolatynbyz.
Sondaı-aq A.Býblık juptyq synda da qadamyn sátti bastady.
