Tennıs: Aleksandr Býblık Istbýrn týrnırin jeńispen bastady
NUR-SULTAN. QazAqparat - Qazaqstannyń birinshi, álemniń 39-raketkasy Aleksandr Býblık Istbýrn (Ulybrıtanııa) ATP 250 týrnırin jeńispen bastady, dep habarlaıdy QazAqparat tilshisi.
A.Býblık alǵashqy aınalymda negizgi dodaǵa irikteý saıystarynan keıin qosylǵan otandasy, dúnıejúzilik reıtıngte 106-orynda turǵan Mıhaıl Kýkýshkınmen kezdesti.
Buǵan deıin qarsylastar bir-aq ret sheberlik baıqasyp, onda Kýkýshkınniń mereıi ústem bolǵan eken.
Bul joly Býblık oıyn tizginin birden qolyna alyp, 6:1, 6:4 esebimen jeńiske jetti.
Bir saǵatqa jýyq ýaqytqa sozylǵan matchta A.Býblık 18 eıs, 4 breık jasady. Qarsylasy bir breıkke ǵana qol jetkizdi.
A.Býblık shırek fınalǵa shyǵý úshin álemniń 72-raketkasy, Belarýs ókili Egor Gerasımovpen talasady.
Taǵy bir qazaqstandyq Dmıtrıı Popko Ýımbldon týrnıriniń irikteý saıysynda latvııalyq Ernest Gýlbısten 3:6, 7:5, 4:6 esebimen jeńilip qaldy.
Eske sala keteıik, budan buryn ıAroslava Shvedovanyń Olımpıadaǵa qatysyp, el namysyn qorǵaý zor mártebe ekendigin aıtqanyn, Elena Rybakınanyń Istbýrn týrnıriniń ekinshi aınalymyna shyqqanyn jazǵan bolatynbyz.
