Tennıs: Aleksandr Býblık Frantsııadaǵy týrnırdiń fınalyna shyqty
ASTANA. QazAqparat - Qazaqstandyq tennısshi Aleksandr Býblık Frantsııadaǵy Raý týrnıriniń jartylaı fınalynda kort ıesi Gregýar Barrermen kúsh synasty, dep habarlaıdy QazAqparat tilshisi.
Osy jarystyń 1-raketkasy, bıyl 25-ke tolǵan frantsııalyq tennısshi dúnıejúzilik reıtıngte125-orynda bolsa, 21 jasar qazaqstandyq sportshy 153-satyda edi.
Birinshi partııa barysynda tennısshiler bir-birden breık jasady. Esep 4:4 bolyp turǵan mezette qarsylasy dop bergende, geım tartysty órbip, A.Býblık breık-poıntty paıdalana almady. Aqyry set taı-breıkke jalǵasty. Munda qazaqstandyq tennısshi qarsylasynyń mını-breıkter jasaýyna múmkindik berip qoıdy - 0:3. Degenmen ol tarazy basyn teńestirip, jeńiske jete aldy - 8:6.
Ekinshi sette toǵyzynshy geımde breık jasaǵan frantsııalyq tennısshi alǵa shyqty - 5:4. Degenmen sodan keıin G.Barrer dop bergende, tamasha oınaǵan A.Býblık esepti qaıta teńestirdi - 5:5. Matchty Býblık taǵy bir breıkpen bitirdi - 7:5.
Tartysty báseke saǵat jarymdaı ýaqytqa sozyldy.
Kezdesý barysynda qazaqstandyq tennısshi 21 eıs jasasa, qarsylasy buǵan bir ret qana qol jetkize aldy. Kerisinshe dop bergende, A.Býblık kóbirek (5-1) qatelesti. Munyń ornyn Aleksandr eıspen toltyryp otyrdy.
Fınalda qazaqstandyq tennısshi álemniń 264-raketkasy, slovakııalyq Norbert Gombosh nemese reıtıngte 283-oryndaǵy belgııalyq Stıv Darsıstiń bireýimen bas júldeni sarapqa salady.
Eske sala keteıik, budan buryn A.Býblıktiń Raý týrnıriniń jartylaı fınalyna shyqqanyn jazǵan bolatynbyz.
Bıyl qazaqstandyq tennısshi Býdapesht týrnıriniń jeńimpazy atanǵan bolatyn. Endi, mine, sondaı ekinshi múmkindik týyp tur.
Taǵy bir qazaqstandyq Zarına Dııas Indıan-Ýells týrnırin sátti bastap, keıin shırek, odan soń jartylaı fınalǵa joldama aldy.
Reıtıngte 96-orynda turǵan Z.Dııas álemniń 94-raketkasy, amerıkalyq Djennıfer Bredımen fınaldyń joldamasyn sarapqa salady.
