Tennıs: Aleksandr Býblık Doha týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 44-raketkasy Aleksandr Býblık Doha ATR 250 týrnıriniń ekinshi aınalymyna shyqty, dep habarlaıdy QazAqparat tilshisi.
Qazaqstandyq tennısshi alǵashqy aınalymda dúnıejúzilik reıtıngte 201-orynda turǵan, negizgi jarysqa irikteý saıystarynan keıin qosylǵan úndistandyq Ramkýmar Ramanatanmen kezdesti.
Birinshi partııada A.Býblık 6:4 esebimen basym tústi.
Ekinshi sette esep 1:1 bolǵan mezette taǵy da breık jasaı bildi. Taǵy bir breık – 5:2. Sodan keıin matchqa dop bergende, esh qınalǵan joq – 6:2.
Báseke 1 saǵat 13 mınýtqa sozyldy.
A.Býblık ekinshi aınalymda álemniń 14-inshi, osy dodanyń 5-raketkasy, ıspanııalyq Roberto Baýtısta-Agýt nemese reıtıngte 39-satydaǵy amerıkalyq Reıllı Opelkanyń bireýimen sheberlik baıqasady.
Júlde qory 891 myń AQSh dollaryna jýyqtaıtyn doda 14 naýryz kúni márege jetedi.
Eske sala keteıik, budan buryn Elena Rybakınanyń Dýbaı týrnıriniń ekinshi aınalymyna shyqqanyn jazǵan bolatynbyz.
