Tennıs: Aleksandr Býblık Antalııa týrnıriniń fınalyna shyqty
NUR-SULTAN. QazAqparat – Qazaqstannyń birinshi, álemniń 49-raketkasy Aleksandr Býblık Antalııa ATP 250 týrnıriniń fınalyna shyqty, dep habarlaıdy QazAqparat tilshisi.
Osy dodanyń 8-raketkasy bolyp tirkelgen qazaqstandyq tennısshi jartylaı fınalda dúnıejúzilik reıtıngide 72-orynda turǵan frantsııalyq Jeremı Shardımen kúsh synasty.
A.Býblık 23-te bolsa, sporttyq jolynda 2009 jyly Shtýtgartta úzdik shyqqan tájirıbeli qarsylasy odan týra 10 jasqa úlken edi.
Birinshi partııada qazaqstandyq sportshy 5:2 esebimen alǵa ketti. Sodan keıin setke dop bergenimen, J.Shardı breık jasaı aldy. Degenmen A.Býblık ekinshi múmkindigin múlt jibergen joq – 6:4.
Ekinshi sette esep 1:1 bolǵan mezette Býblık breıkke qol jetkizip, sosyn óz geımin de aldy – 3:1. Áıtse de Shardı qarymta qaıtaryp, ózi alǵa shyqty – 5:4. Taı-breıkte Jeremıdiń joly boldy – 7:6 (7:4).
Úshinshi, sheshýshi partııada esep 4:3 bolǵan mezette Býblık breık jasap ketti. Sodan keıin matchty jeńispen túıindedi – 6:3.
Tartysty báseke 2 saǵat 5 mınýtqa sozyldy.
A.Býblık fınalda álemniń 23-raketkasy, aýstralııalyq, 21 jastaǵy Aleks de Mınaýrmen chempıondyq ataqty sarapqa salady. Aýstralııalyq tennısshi jartylaı fınalda álemniń 16-ynshy, osy jarystyń 2-raketkasy, belgııalyq Davıd Goffendi 6:4, 3:6,6:2 esebimen utty.
Jastyǵyna qaramastan, A.Mınaýr – ATP týrnırlerin úsh márte utqan sportshy. A.Býblık ázirge ondaı tabysqa qol jetkize qoıǵan joq.
Fınaldyq match 13 qańtar kúni ótedi.
Eske sala keteıik, budan buryn Zara Darkenniń Eýropa jasóspirimder reıtıngisinde úzdik otyz tennısshiniń qataryna kirgenin , Aleksandr Býblıktiń Antalııada álemniń onynshy raketkasyn utqanyn jazǵan bolatynbyz.
