TENNIS: AQSh myqty ma, Reseı kúshti me?

Áıelder arasyndaǵy básekede shırek fınalǵa úsh amerıkandyq, eki reseılik tennısshi joldama alǵan bolatyn. Keshe álemniń ekinshi raketkasy Marııa Sharapova dúnıejúzilik satyda jetinshi orynda turǵan kanadalyq Ejenı Býshardy asa qınalmaı utyp, jartylaı fınalǵa joldama aldy.Taǵy bir reseılik, reıtıngte onynshy oryndaǵy Ekaterına Makarova osy oıynda kópshilik mamandar jeńedi dep eseptegen rýmynııalyq, álemniń úshinshi raketkasy Sımona Halepti joldan taıdyrdy. Sóıtip ol sporttyq ómirinde alǵash ret úlken dýlyǵanyń jartylaı fınalynda oınaıtyn boldy. Bul - M.Sharapova jeńse de, E.Makarova utsa da, fınalda reseılik tennısshi bas júldeni sarapqa salady degen sóz. Al búgin qalǵan eki joldamanyń ıeleri belgili bolady. Munda apaly-sińlili Vınýs pen Serena Ýılıamstiń joly bolýy ábden yqtımal. Ol úshin úlken dýlyǵany 18 márte, sonyń ishinde Avstralııa ashyq birinshiligin bes ret utqan álemniń birinshi raketkasy Serenanyń slovakııalyq, osy chempıonattyń ótken jylǵy fınalısi, dúnıejúzilik reıtıngte 11-inshi orynda turǵan Domınıka Tsıbýlkovany jeńýi kerek. Al 34 jasar Vınýs ózinen 15 jas kishi, on toǵyz jasar taǵy bir amerıkandyq, osy týrnırdiń basty jańalyǵy Medıson Kısti synǵa salady. Munda kezinde úlken dýlyǵany jeti ret, sonyń ishinde Ýımbldon týrnırin bes márte jeńip alǵan Vınýstyń tájirıbesi paıdaǵa asýy múmkin. Qalaı etkende de, keminde bir amerıkandyq tennısshi jartylaı fınalǵa shyǵady. Serena da qarap qalmas. Sondyqtan senbi kúngi fınalda amerıkandyq pen reseılik oıynshynyń sońǵy synǵa túsýi múmkin jaıt.

Erler arasyndaǵy básekeler de qyzý ótýde. Keshe chehııalyq, álemniń jetinshi raketkasy Tomash Berdyh ózinen bes saty joǵary turǵan ataqty ıspandyq Rafael Nadaldy san soqtyrsa, ulybrıtanııalyq, altynshy oryndaǵy Endı Marreı avstralııalyq jas tennısshi Nık Kırosty utyp, jartylaı fınalǵa shyqty. Búgin álemniń birinshi raketkasy, serbııalyq Novak Djokovıch pen kanadalyq, altynshy oryndaǵy Mılosh Raonıchtiń, dúnıejúzilik satyda sáıkesinshe tórtinshi jáne besinshi satyda turǵan, shveıtsarııalyq, Avstralııa chempıonatynyń ótken jylǵy jeńimpazy Stanıslas Vavrınka men japonııalyq Keı Nısıkorı juptary taǵy eki úmitkerdi anyqtaıdy. Erler arasyndaǵy fınaldyq báseke jeksenbi kúni bolmaqshy.

Aıta keteıik, bıylǵy Avstralııa chempıonaty qazaqstandyqtar úshin de asa sátsiz deýge kelmes. Elimizdiń birinshi jáne ekinshi raketkalary Zarına Dııas pen ıAroslava Shvedova úshinshi aınalymǵa deıin jetti. Bul olardyń dúnıejúzilik reıtıngtegi oryndaryn saqtap qalýǵa, tipti jańartýǵa múmkindik beredi. Álemniń 31-inshi raketkasy Z.Dııas bıyl qalaıda úzdik jıyrma tennısshiniń qataryna kiremin dep málimdeme jasap otyr. Taǵy bir jaqsy jańalyq, biraz jylǵy úzilisten keıin Zarına Qazaqstan quramasy sapynda aqpan aıynyń basynda Qytaıda tennıs federatsııasynyń kýbogy úshin el namysyn qorǵamaqshy. Sodan keıin Shtýtgart, Madrıd, Rım qalasyndaǵy halyqaralyq týrnırlerde kortqa shyǵady. Árıne, basty maqsat úlken dýlyǵanyń qalǵan týrnırleri - Ýımbldon, Rolan Garros, AQSh-tyń ashyq chempıonatynda barynsha tabysty óner kórsetip, upaı qoryn molaıtý bolsa kerek.