Tennıs ÁCh: Qazaqstan jasóspirimder quramasy irikteý jarysyn ekinshi orynmen túıindedi

ASTANA. KAZINFORM — Malaızııanyń Kýchıng qalasynda 14 jasqa deıingiler arasynda tennısten álem chempııonatynyń Azııa — Tynyq muhıt aımaǵy boıynsha irikteý týrnıri aıaqtaldy.

Іrikteý jarysynda alǵash ret fınalǵa shyqqan Qazaqstan jasóspirimder quramasy tarıhı nátıjege qol jetkizdi. 

Saǵadat Aıaptyń shákirtteri sońǵy básekede Japonııa quramasyna 0:2 esebimen jol berdi. 

— Qazaqstan quramasyn Azııa — Tynyq muhıt aımaǵy boıynsha irikteý dodasynda ekinshi oryn alyp, álem chempıonatynyń fınaldyq kezeńine shyǵýymen quttyqtaımyn. Ahmadı Maqanov, Haqnazar Jetkerbaı, Beksultan Baýyrjanov jáne kapıtan Saǵadat Aıap komandalyq synda shyńdala túskendigin, sporttyq minez ben daıyndyqtyń joǵary deńgeıin kórsete bildi. Bul nátıje Qazaqstan tennıs federatsııasy júzege asyryp otyrǵan strategııanyń tıimdiligin tanytady, — dedi Qazaqstan tennıs federatsııasynyń vıtse-prezıdenti Dıas Dosqaraev.

Qazaqstan quramasy shırek fınalda Qytaılyq Taıbeı komandasyn 2:1 esebimen jeńgennen keıin álem chempıonatynyń fınaldyq kezeńine merziminen buryn shyqqan bolatyn. 

Jasóspirimder arasynda komandalyq álem chempıonatynyń fınaldyq týrnıri bıyl 4-9 tamyzda Chehııanyń Prosteev qalasynda ótedi.

Dúnıejúzilik dodaǵa Azııadan Qazaqstanmen qatar Japonııa, Koreıa jáne Gonkong joldama aldy. 

Qytaı, Aýstralııa, Úndistan sııaqty myqty quramalar álem chempıonatynan tys qaldy.

Eske sala keteıik, budan buryn tennısten álem chempıonatynda Qazaqstan jasóspirimder quramasynyń irikteý týrnıriniń fınalyna shyqqanyn jazǵan bolatynbyz.

Sondaı-aq qazaqstandyq tennısshilerdiń álemdik reıtıngidegi orny anyqtaldy.