Tennessııada muǵalimderge evolıýtsııa teorııasyn joqqa shyǵarýǵa ruqsat berildi
ASTANA. 12 sáýir. QazAqparat - Tennessııada evolıýtsııa teorııasy sııaqty burynnan jalpylaı qabyldanyp, qoldanylyp kele jatqan teorııalardy joqqa shyǵarǵan muǵalimderdi jazalaýǵa tyıym salatyn arnaıy zań qabyldandy,
dep habarlaıdy Los Angeles Times.
Gýbernator-respýblıkashy Bıll Heslem bul zań jobasyna qarsy veta qoımaǵan, alaıda ony qoldaıtyndyǵyn da bildirmegen. Degenmen, ol zańnyń habyldanýy úshin gýbernatordyń qoly bolýy mindetti emes bolyp shyqqan.
Qujatta atalmysh zańdy qandaı da bir dinı nemese dinge qarsy doktrınalardy qaralaýǵa paıdalanýǵa bolmaıtyndyǵy jazylǵan.
Jańa jobanyń jaqtastary endi muǵalimder burynnan qalyptasqan doktrınalardyń durysy men burysyn emin-erkin taldap, adamnyń qalaı paıda bolǵany men klımattyń qalaı ózgergendigi týraly oılaryn búkpesiz aıtatyn boldy deıdi. Alaıda osyǵan baılanysty oqý baǵdarlamasy ózgertilmeıdi.
Al jobanyń qarsylastary endi túpkiǵylymı kózqarastarǵa jappaı shabýyl jasalyp, olardyń qundylyǵy ketedi dep esepteıdi.
Amerıka mektepterinde evolıýtsııa teorııasyn oqytý máselesi únemi qoǵamdyq nazardy ózine aýdarýmen kele jatyr. Gallup kompanııasy 2010 jyly jasaǵan saýalnamada el azamattarynyń 40 paıyzy adamdy Qudaı dál osy keıpinde jaratty degenge senetindikterin aıtqan. 38 paıyz respondentter adam evolıýtsııalyq jolmen qalyptasty, alaıda bul úderisti Qudaı júrgizdi degenge senedi. Amerıkandyqtardyń tek 16 paıyzy ǵana adam evolıýtsııasynda Qudaıdyń esh qatysy joq dep esepteıdi.
