Tennessı túrmesindegi 5 tutqynnyń ólimine qatysty qylmys tergelip jatyr
ASTANA. KAZINFORM — AQSh-tyń Tennessı shtatyndaǵy Northwest Correctional Complex túzeý mekemesinde bolǵan tutqyndardyń ólimi, qyzmetkerlerge jáne sottalǵandarǵa jasalǵan shabýyldar, sondaı-aq ózge de zorlyq-zombylyq fakileri boıynsha Leık okrýginiń úlken alqabıler alqasy 19 qylmystyq is aıasynda 50 aıyp taqty. Bul týraly Associated Press agenttigi jazdy.
Atap aıtqanda, 2025–2026 jyldary bolǵan 5 túrli ár ýaqyttaǵy tutqyndardy óltirý deregi tergelip jatyr. Aıyptalýshylardyń esimderi ázirge jarııalanǵan joq. Prokýratýra olardy barlyq kúdiktiler ustalǵannan nemese aıyptaý aktisi resmı tapsyrylǵannan keıin jarııalaýdy josparlap otyr.
Prokýratýranyń málimetinshe, 8 adam 2025 jylǵy 12 tamyzda bolǵan tutqyndy qasaqana óltirý isi boıynsha birinshi dárejeli kisi óltirdi degen aıypqa tartylǵan. Budan bólek, túzeý mekemesiniń burynǵy eki qyzmetkerine densaýlyqqa qasaqana aýyr zııan keltirý, shabýyl jasaý, qyzmettik ókilettigin teris paıdalaný, laýazymdyq ókilettigin asyra paıdalaný jáne memlekettik qyzmetshi antyn buzý baptary boıynsha aıyp taǵyldy.
Taǵy 6 adam 2025 jylǵy 8 qazanda qaza tapqan tutqynnyń ólimine qatysty jaýapqa tartylyp otyr.
Sonymen qatar aıyptar qatarynda zorlyq-zombylyq, urlyq, adam óltirýge oqtalý, túzeý mekemesi qyzmetkerlerine shabýyl jasaý jáne esirtki zattaryn zańsyz saqtaý faktileri de bar.
— Sońǵy birneshe jylda túzeý mekemeleri departamentine qarasty oryndardaǵy zorlyq-zombylyq deńgeıi aıtarlyqtaı ósti. Qyzmetkerler men jazasyn ótep jatqan adamdardyń qaýipsizdigin qamtamasyz etý úshin bul ister boıynsha tergeý men qylmystyq qýdalaýdy jalǵastyramyz, — dedi Gýdman.
Tennessı shtatynyń túzeý mekemeleri departamenti taǵylǵan aıyptar men túzeý keshenindegi jaǵdaıǵa qatysty saýaldarǵa ázirge jaýap bergen joq.
