Teńizshevroılǵa kóp kólemde gaz shyǵarǵany úshin 278 mln teńge aıyppul salyndy
ATYRAÝ. QazAqparat - Teńiz munaı ken ornynda kóp kólemde gaz shyǵarǵan «Teńizshevroıl» JShS-ke 278 mln teńge aıyppul salyndy, dep habarlaıdy «QazAqparat» HAA tilshisi.
«Jylyoı aýdandyq prokýratýrasynyń talaby negizinde jospardan tys tekserýler barysynda 2017 jylǵy 30 mamyrda «Teńizshevroıl» JShS-tiń Teńiz gaz óńdeý zaýytynda qondyrǵy isten shyqqany anyqtaldy. «Teńizshevroıl» JShS gaz jáne lastaǵysh zattar shyǵarý túrinde erkin emıssııany júzege asyrǵan. Bul QR Ekologııalyq kodeksiniń 3-babynyń 12-bóligine, 68-babynyń 1-bóligine qaıshy keledi», - deıdi oblystyq sottyń baspasóz qyzmetindegiler.
«Teńizshevroıl» JShS ákimshilik quqyq buzýshylyǵy sotta faktilermen dáleldendi. «Atyraý qalalyq mamandandyrylǵan ákimshilik sotynyń qaýlysymen «Teńizshevroıl» JShS Qazaqstan Respýblıkasy Ákimshilik quqyq buzýshylyq týraly kodeksiniń 328-babyna sáıkes aıypty dep tanylyp, 278 mln 468 myń 95 teńge kóleminde aıyppul salyndy», - dep málimdedi oblystyq sottyń baspasóz qyzmeti.
