«Teńizshevroıldan» ekologııalyq zańnamany buzǵany úshin 726 mln-nan astam teńge óndirildi
Atyraý oblysy boıynsha ekologııa departamenti baspasóz qyzmetiniń málimetinshe, buǵan deıin «Teńizshevroıl» JShS-ne qatysty ekologııalyq zańnamanyń saqtalýy boıynsha baqylaý sýbektisine (obektisine) barý arqyly profılaktıkalyq baqylaý jáne jospardan tys tekserý júrgizilgen. Nátıjesinde kompanııa tarapynan qorshaǵan ortaǵa lastaýshy zattar shyǵaryndylaryn, onyń ishinde alaý qondyrǵylarynda gaz jaǵý saldarynan normatıvten tys emıssııalar júzege asyrylǵany anyqtalǵan.
«Osyǵan baılanysty «Teńizshevroıl» JShS-ne elimizdiń ekologııalyq zańnamasyn buzý nátıjesinde keltirilgen zalaldardy óteý týraly 145 988 808 teńge, 60 985 880 teńge jáne
519 477 172 teńge kóleminde nusqamalar berildi. Alaıda, «Teńizshevroıl» JShS tarapynan joǵaryda kórsetilgen nusqamalar erikti túrde oryndalmady. Sol sebepten,departament Nur-Sultan qalasynyń sotyna «Teńizshevroıl» JShS-nen memleket kirisine zalaldardy óndirip alý týraly talap aryzben júgindi. Nur-Sultan qalalyq sotynyń 2020 jylǵy 21 qazandaǵy jáne 2 qarashadaǵy sheshimderimen departamenttiń «Teńizshevroıl»
JShS-ne qatysty talap aryzdary qanaǵattandyryldy», -dep habarlady departamentttiń baspasóz hatshysy Aslan Jeńisuly.
«Teńizshevroıl» JShS sot sheshimderimen kelispegen. Sóıtip, departamenttiń nusqamalary men sot sheshimderiniń kúshin joıý, talap-aryzdardy qanaǵattandyrýdan bas tartý, jańa sheshimderdi qabyldaý týraly apellıatsııalyq shaǵym bergen. QR Joǵarǵy
Sotynyń mamandandyrylǵan sot alqasy «Teńizshevroıl» JShS-niń apellıatsııalyq shaǵymdaryn qanaǵattandyrýdan bas tartqan. Sot sheshimderi zańdy kúshine endi. «Osylaısha, «Teńizshevroıl» JShS-nen jalpy somasy 726 451 860 teńge kóleminde joǵaryda atalǵan zalaldar memleket kirisine óndirip alyndy», -dedi Aslan Jeńisuly.
Eske sala ketelik, budan buryn kúkirti mol gazdy jaqqan «Embimunaıgaz» AQ-dan 1,3 mlrd teńge óndirilgenin jazǵan bolatynbyz.
