«Teńizshevroıl» munaıshylardyń 90% vaktsınadan bas tartty degendi joqqa shyǵardy
NUR-SULTAN. QazAqparat - Qazaqstandaǵy eń iri munaı óndirýshi «Teńizshevroıl» kásiporny munaıshylardyń 90% COVID-19 qarsy vaktsına alýdan bas tartqany týraly aqparatty joqqa shyǵardy, dep habarlaıdy QazAqparat Stopfake.kz silteme jasap.
«Teńizshevroıl» kompanııasynyń úkimetpen jáne jurtshylyqpen baılanys bóliminiń bas menedjeri Yrzabek Artyǵalıev vaktsınatsııa shtattyq rejimde júrgizilip jatqanyn jetkizdi.
«12 sáýirge deıin TShO-ǵa tórt myńǵa jýyq doza vaktsına berildi. Búgingi tańda myńnan astam qyzmetker vaktsına aldy. Taǵy 6,5 myńnan astam adam ekpe jasatýǵa nıet bildirip, ony vaktsınanyń túsýine qaraı alady. Bizde munaıshylardyń 90 paıyzy vaktsınatsııadan bas tartqany týraly aqparat joq. Qaıtalap aıtamyn, adamdar vaktsına jasatýǵa kezekke turýda. TShO kompanııasynyń qyzmetkerleriniń kóbi vaktsınany turǵylyqty jeri boıynsha óz emhanasynda alyp jatqanyn bilemin», – dedi ol.
Buǵan deıin jańalyqtar portaldarynda jarııalanǵan mátinde munaıshylardyń vaktsınatsııadan bas tartýyna vahtada ótkizgen qosymsha ýaqyt úshin tólenetin tólemnen aıyrylyp qalý múmkindigi sebep bolýy yqtımal ekendigi jazylǵan. Búginde qyzmetkerler jumysqa kirispes buryn oqshaýlanýǵa mindetti. TShO-nyń habarlaýynsha, qazirgi ýaqytta COVID-19 jaǵdaıyna baılanysty ótemaqy tóleý baǵdarlamasy qaıta qaralyp jatyr. Sondaı-aq ol elimizdegi jáne teńizdegi epıdemıologııalyq jaǵdaıǵa baılanysty bolady.
«SES málimetteri boıynsha, 2021 jylǵy 26 naýryzdan bastap tolyq vaktsınatsııalanǵan qyzmetkerlerge vahtaǵa kelgennen keıin oqshaýlanýdyń qajeti joq», – dep jaýap berdi kompanııadan.
