«Teńizshevroıl» atmosferaǵa gazdyń taralý sebebin anyqtaýda

ATYRAÝ. QazAqparat - Atyraý oblysynda «Teńizshevroıl» kompanııasyna tıesili Teńiz munaı ken ornynda atmosferaǵa gazdyń taralý sebepteri anyqtalýda, dep habarlaıdy QazAqparat tilshisi.

Eske sala keteıik, atmosferaǵa gazdyń taralýy týraly senbi kúni áleýmettik jelilerden belgili boldy. Munaı ázirleıtin qondyrǵy qubyrlarynyń ár tusynan túsirilgen vıdeoda odan tútin sekildi aqshyl tústi gazdyń shyǵyp jatqany kórindi. Barlyq qoldanýshylar qaýipsizdik sharalaryn eskermeı, zaýytty qaýipti qashyqtyqtan túsirgen. Bul áreket jumysshylar túgeldeı evakýatsııalanǵanymen túsindirildi.

TShO baspasóz qyzmeti oqıǵaǵa qatysty túsinik berdi.

«Teńizshevroıl» 23 maýsym kúni Keshendi tehnologııalyq jeli zaýytynda tehnologııalyq aqaý saldarynan atmosferaǵa gazdyń taraǵanyn rastaıdy. Jedel qyzmetkerler quramynan bólek barlyq personal tehnıkalyq qaýipsizdik sharalaryna sáıkes zaýyttan shyǵaryldy. Oqıǵa saldarynan zardap shekkender joq. Sálden soń qyzmetkerler óz oryndaryna oralyp, barlyq jumystar qaıta jalǵasty. Arnaıy memlekettik organdarǵa oqıǵa jóninde aqparat berildi. Oryn alǵan jaǵdaıdyń mán-jaıyn anyqtaý úshin  barlyq qajetti sharalar qolǵa alynady», - dep atap ótti kompanııanyń baspasóz qyzmeti «QazAqparat» HAA-nyń resmı saýalyna.