Teńizge yqqan jasóspirim 49 kúnnen keıin qutqaryldy
ASTANA. QazAqparat - Arpeggio qurǵaq júk tasıtyn kemesi Gýam aralynyń mańynda daýyl saldarynan teńizge yqqan lashyqtaǵy ındonezııalyqty qutqaryp qaldy. Bul týraly Jakarta Post habarlady.
Jasóspirim balyq aýlaýǵa arnalǵan statsıonarlyq torda jumys istegen. Ol lashyqta balyqtardy qyzyqtyratyn jaryqtyń janyp turýyn qadaǵalaǵan.
Shildede qatty daýyl saldarynan onyń shaǵyn kemesi teńizge yǵyp ketken. Ol Sýlavesı aralynan áldeqaıda alysqa ketip qalǵan. Indonezııalyqqa qolda bar tamaǵy birneshe kúnge ǵana jetken. Ol ashtyq pen shólden ólip qalmas úshin balyq aýlap, kemeniń bólikterin jaqqan jáne teńiz sýyn ishken. Ol sýdyń tuzdylyǵyn ketirý úshin kıiminen ótkizgen.
Osakadaǵy Indonezııa konsýldyǵy málimdegendeı, onyń janynan 10 keme elemeı óte shyqqan. Ashyq teńizde ótkizgen 49-ynshy kúni jas jigitti Japonııaǵa bet alǵan Panama týynyń astyndaǵy júk tasıtyn keme baıqap qalǵan. Abyroı bolǵanda, Adılang radıosıgnal jiberip, ekıpajdyń nazaryn ózine aýdarady. Ony Japonııaǵa jetkizip, keıin Indonezııa konsýldyǵyna tapsyrǵan.
