Teńizde jumys isteıtin Almaty oblysynyń turǵyndary eki kún karantınde bolady
TALDYQORǴAN. QazAqparat - Búgin «Teńizshevroıl» JShS-da jumys isteıtin Almaty oblysynyń 64 turǵyny Atyraýdan áýe reısimen Almaty áýejaıyna jetkiziledi. Olar Qapshaǵaı qalasy mańyndaǵy «Kúnshýaq» demalys ornyna ornalasyp, eki kún karantınde bolady, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Seriktestik qyzmetkerleri sońǵy aıda Teńiz kenishinde vahtalyq aýysymda jumys istegen, olar COVID-19 ınfektsııasy anyqtalǵan Vaternas vahtalyq kentinde turmaǵan. Degenmen, qaýipsizdik maqsatynda áýe reısine koronavırýs ınfektsııasyna tekserý ekspress-testiniń nátıjesi teris bolǵandar ǵana otyrǵyzyldy.
Olar Qapshaǵaı qalasyna jetkizilgennen keıin eki kún karantınge alynady. Oblys basshylyǵynyń tapsyrmasymen atalǵan demalys ornynda barlyq sanıtarlyq-dezınfektsııalyq sharalar saqtalyp, karantın kezinde jolaýshylardyń ómir súrýine qajetti barlyq jaǵdaılar tolyq qarastyrylǵan. Eki kúnnen keıin atalǵan jolaýshylar turǵylyqty jerlerine arnaıy avtobýstarmen jetkiziletin bolady.
