Teńizde aýaǵa gaz tarap ketýine baılanysty jospardan tys tekserý bastaldy
ATYRAÝ. QazAqparat - Teńizde aýaǵa gaz taraýyna baılanysty jospardan tys tekserý júrgiziletin boldy, dep habarlaıdy QazAqparat tilshisi.
«Mamandar jospardan tys tekserýge kiristi. Onyń barysynda atmosferaǵa kelip túsetin lastaýshy zattardyń kólemi anyqtalady», - dep habarlady Atyraý oblystyq ekologııa departamenti.
Eske sala keteıik, atmosferaǵa gazdyń taralýy týraly senbi kúni áleýmettik jelilerden belgili boldy. Munaı ázirleıtin qondyrǵy qubyrlarynyń ár tusynan túsirilgen vıdeoda odan tútin sekildi aqshyl tústi gazdyń shyǵyp jatqany kórinip tur. Barlyq qoldanýshylar qaýipsizdik sharalaryn eskermeı, zaýytty qaýipti qashyqtyqtan túsirgen. Olar muny jumysshylardyń túgeldeı evakýatsııalanǵanymen túsindirdi.
TShO baspasóz qyzmeti oqıǵaǵa qatysty túsinik berdi.
«Teńizshevroıl» 23 maýsym kúni Keshendi tehnologııalyq jeli zaýytynda tehnologııalyq aqaý saldarynan atmosferaǵa gaz tarap ketkenin rastaıdy. Jedel qyzmetkerler quramynan bólek barlyq personal tehnıkalyq qaýipsizdik sharalaryna sáıkes zaýyttan shyǵaryldy. Oqıǵa saldarynan zardap shekkender joq. Sálden soń qyzmetkerler óz oryndaryna oralyp, barlyq jumystar qaıta jalǵasty. Arnaıy memlekettik organdarǵa oqıǵa jóninde aqparat berildi. Oryn alǵan jaǵdaıdyń mán-jaıyn anyqtaý úshin barlyq qajetti sharalar qolǵa alynady», - dep atap ótti kompanııanyń baspasóz qyzmeti «QazAqparat» HAA-nyń resmı saýalyna.
