Teńiz vahtasynda bolǵan 200 jumysshy Almatyǵa jetkizildi
ALMATY. QazAqparat – Atyraý oblysyndaǵy ken ornynyń vahtashy jumysshylary bar áýe reısi Almatyǵa qondy. Bul týraly QazAqparat ákimdikke silteme jasap habarlaıdy.
«Teńizshevroıl» JShS qyzmetkerleri ótken aı boıy Teńizde jumys vahtasynda bolǵan. Kompanııa basshylyǵy jumysshylardy turǵylyqty meken-jaılary boıynsha qaıtarý týraly sheshim qabyldaǵan.
Jolaýshylardyń bári Atyraý oblysy boıynsha Taýarlar men qyzmetterdiń sapasyn baqylaý departamentine qajetti saýalnamalar men qolhattardy toltyrǵan.
Sonymen birge, jumysshylarǵa test júrgizilip, nátıjesi teris bolǵan jaǵdaıda ǵana ushaqqa otyrǵyzylýǵa ruqsat etilgen. 200 adamnyń bári Almaty jáne Almaty oblysynyń, sonyń ishinde Taldyqorǵan qalasynyń turǵyndary bolyp tabylady.
Qaýipsizdikti qamtamasyz etý maqsatymen jumysshylaryń barlyǵy kelgennen keıin koronavırýsqa analız tapsyryp, nátıjeleri belgili bolǵansha karantınge jatqyzyldy.
Atap ótetini, ken ornynan jumysshylardyń Almatyǵa deıin ushaqpen kelýi, qyzmetkerlerge test júrgizý jáne karantın uıymdastyrý jumys berýshilerdiń esebinen júzege asyryldy.
