Teńiz vahta qalashyǵynda koronavırýs juqtyrǵan áıelmen baılanysta bolǵandar karantın tártibin buzdy
ATYRAÝ. QazAqparat – Teńiz ken ornyndaǵy vahta qalashyǵynda koronavırýs juqtyrǵan áıelmen baılanysta bolǵandar karantın tártibin qatań buzyp otyr, dep habarlaıdy QazAqparat.
Atyraý oblysy bas sanıtar dárigeriniń aıtýynsha, TShO merdiger kompanııalarynyń birinde jumys isteıtin qyzmetker vırýs juqtyrǵan. 50 jastaǵy áıel búginde ınfektsııalyq statsıonarda em alyp jatyr. Onymen jaqyn qarym-qatynasta bolǵan 9 adam koronavırýsty anyqtaý úshin test tapsyrdy. Olardyń eshqaısynda indet joq bolyp shyqty. Áıelder ózderinen vırýs tabylmaǵan sáttegi qýanyshyn vıdeoǵa túsirip, áleýmettik jelide taratyp jibergen.
Sondaı-aq olar ızolıatordan ketip qalǵan. Medpersonaldyń aıtqanyna baǵynbaı, karantın aıasyndaǵy talaptardy saqtamaı otyr. Muny sol áıelder jumys isteıtin kompanııa basshylyǵy rastady. Atalmysh mekeme olarǵa qatysty shara qoldanýǵa ýáde berdi.
Sonymen qatar, 27 naýryz kúni ushyp kelgen Ystanbul-Atyraý reısiniń 57 jolaýshysy «Bereke» yqshamaýdanyna aýystyryldy. Olardyń árqaısysy bir páterge jaıǵasyp, oqshaýlandy.
Eske sala keteıik, sońǵy eki kúnde qaıta testileý kezinde karantınge jatqyzylǵan birneshe adamnan koronavırýs tabylǵan edi. Sondyqtan olarmen baılanysta bolǵandardy «Berekege» aýystyrý týraly sheshim qabyldanǵan. 26 naýryzda ushyp kelgen Amsterdam-Atyraý reısiniń 15 jolaýshysy da osynda kóshirildi.
Qazirgi tańda Atyraý oblysynda COVID-19 ınfektsııasyn juqtyrǵan 42 adam bar.
