«Teńiz» munaı kesheninde jumys isteıtin aqtóbelikter óńirge oralady
AQTÓBE. QazAqparat - «Teńiz» munaı kesheninde 1800 aqtóbelik jumys isteıdi. Olar úsh kezeńmen óńirge jetkiziledi, dep habarlaıdy QazAqparat tilshisi.
«Qazir oblys ákimdigi aqtóbelik jumysshylardy jetkizý, olardy ornalastyrýdy josparlap jatyr. Bárin birden ákelip, karantındik gospıtalge jatqyzý qıyn. Óıtkeni qazir ózge óńirlerden kelip jatqan adamdar da bar. Arasynda koronavırýs ınfektsııasyn juqtyrǵan adamdarmen baılanysta bolǵandar da bar. Bárin eskerip, jumysshylardy úshke bólip ákelý josparlandy. Alǵashqy toby 21 sáýir kúni keledi. Olardyń barlyǵy karantındik gospıtalde bolady. Oqshaýlanady, jedel test tapsyrady. Dert anyqtalmasa aýdan turǵyndary eki kúnnen soń úıine jiberiledi», - dedi oblystyq densaýlyq saqtaý basqarmasynyń basshysy Áset Qalıev.
Aıta keteıik, qazir Aqtóbe oblysynyń ózinde vahtalyq ádispen jumys isteıtinderdiń aýysymy toqtady. Oblystyq taýarlar men kórsetiletin qyzmetter sapasy men qaýipsizdigin baqylaý departameniniń basshysy Nursulý Berkimbaevanyń aıtýynsha, barlyq ken oryndarynyń basshylaryna qańtar aıynda eskertý berilip, aldyn ala rezervke arnalǵan qalashyq daıyndaýdy tapsyrǵan.
«Kásiporyn basshylary eskertýge selsoq qaraǵandyqtan qazir osy máselemen betpe-bet kelip otyr. Óńirde barlyǵy 27 adam indetke shaldyqqany belgili. Demek qaýip bar. Sondyqtan vahtalyq aýysymǵa ruqsat berý máselesi endi qaralady. Jumysqa kirisetinderdiń bári jedel test tapsyrady. Іndet anyqtalmasa, jumysqa barady», - dedi Nursulý Berkimbaeva.
Oblyslyq densaýlyq saqtaý basqarmasynyń basshysy Áset Qalıev te vahtalyq aýysymdy ruqsat berý óte qıyn jumys ekenin aıtty.
«Tek Aqtóbe oblysy emes, ózge óńirden de adamdar jumysqa keletinin eskergen jón. Barynsha qaýipsiz ádisti qoldanamyz», - dedi ol.
